Tamborilé fa un lustro como Festival de “mosica de carrera”

O 15 de chunio a mosica y a borina tienen a suya cita en Mezquita d'Exarc

cartelO festival de “mosica de carrera” Tamborilé ferá iste 15 de chunio as suyas primers cinco anyadas dende que naixió esdevenindo o primer festival d’ista mena en Aragón. Mezquita d’Exarc ye o lugar que ha organizau y acubillau ista iniciativa que cada anyada ha iu viyendo como s’ixamplaba o publico que bi plegaba.

Como en anteriors edicions, a mosica de carrera será la protagonista. Charangas, pasavillas, batucadas, … con mosica de toda mena, protagonizan un festival que prencipiará de maitins y se prolargará dica bien tardi en a maitinada d’o domingo. O maitin tendrá un ambient ta todas las edatz con l’actuación d’o teatro y animación infantil d’a PAI, a mosica tradicional aragonesa de man de Esfuria Tronadas y Alarifes de San Martín y a Txalaparta de Hutsun Txalaparta.

A tardi prencipiará con o reggae de Mañaners, plegaus de Barcelona, ta continar con Falcons de Vilafranca (mosica tradicional catalana), Kultrún batucada (percusión afrolatina dende Valencia), Fanfare Shukar (mosica zingara de Rumanía) y La banda de la María, plegaus dende Sevilla.

Dimpués d’un descanso t’a cena, tornará a sentir-se bellas collas y antimás se contará con o folk metal meyeval de Wyrdamur y o metal brass de Pastors of mupets. A mosica continará dica las 6 con a “txaranga electrica Orkestra“, plegaus dende o País Vasco.

O festival, clamau asinas en clamar-les tamborilers a los habitadors de Mezquita d’Exarc, contará antimás con una zona de acampada de tot de baldes y mercau d’artesanía. Antimás, ista anyada se ferá o II concurso de fotografía d’o festival. Totz os eventos tamién son de baldes y l’horario, como indica a organización, puet tener bellas variacions fruito d’os estaus colectivos d’enfuelgo”. Toda la información se puet consultar en a  web d’o festival.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.