Tarazona contará con visitas teatralizadas mientres tot o verano

Vecins y visitants podrán conoixer Tarazona a traviés de personaches miticos d'a ciudat gracias a un grupo teatral

2013-06-14_grupo-teatral2

Foto: Concello de Tarazona

Totz os sabados, dende o 6 de chulio a o 7 de setiembre, Tarazona contará con visitas teatralizadas por a ciudat, iniciativa que empecipia o grupo de teatro turiasonense “LaCiudadNoEsParaMí” y o Concello turiasonense.

T’a concellera de Turismo, Waldesca Navarro, “se tracta d’una interesant iniciativa con a quala amás de dinamizar a ciudat con diferents actividatz, tanto o visitant como o vecín tendrá a oportunidat de conoixer-la a traviés d’a nuestra historia, con personaches turiasonenses, d’una forma didactica y entretenida”.

A directora de “LaCiudadNoEsParaMí”, Lucía Aguirre, explicó que “as visitas consistirán en pasacarreras teatrals que cuenten a historia d’a nuestra ciudat, pero dende personaches miticos turiasonenses como puede estar Paco Martínez Soria, o Cipotegato, con as qualas buscamos clamar l’atención de l’espectador y tamién nos aduyará a pillar tablas”.

O grupo teatral “LaCiudadNoEsParaMí” naixió en febrero d’o 2013 baixo a dirección de Lucía Aguerri, actriz profesional y profesora de teatro, diplomada por a EMT de Zaragoza y licenciada por a escuela d’interpretación de Jorge Eines. Ye compuesto por 27 personas, d’entre 17 y 78 anyos d’edat, hombres y mullers, treballadors, estudiants u chubilaus, “pero o que nos une ye que somos amants d’o teatro”, subraya Aguerri.

Amás, cuentan con un blog (teatrotarazona.blogspot.com.es) y un perfil en  facebook (LaCiudadNoEsParaMí) dende a on convidan a seguir-les en totz os suyos trangos.

O grupo asaya una vegada a la semana en un local, cediu por o Concello, ubicau en l’antiga estación, y d’a mesma traza ha ufriu un espacio como “camerinos”, ubicau chusto dencima d’a Oficina Municipal de Turismo, t’o vestuario y caracterización d’os actors antes de cada visita.

A Plaza de Sant Francisco será o puesto d’a on ranque l’espectaclo y o coste d’a visita ye de 2 euros (ninos dica 10 anyos de baldes).

Precisament, en o Día d’o Comercio, que se celebró o pasau 2 de chunio,  iste grupo realizó a suya primer visita teatralizada, que, amás de tener un gran exito,  fació honra como preba t’o prochecto que agora empecipiará.

Fuent: http://www.cronicadearagon.es/wordpress/?p=41908

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.