Tarazona empenta recorrius meyoambientals por l’entorno natural d’o municipio

O Concello de Tarazona completa a suya ufierta turistica con istas visitas meyoambientals

recorridos-medioambientales2

Foto: Concello de Tarazona

O Concello de Tarazona, a traviés d’a suya Sección de Meyo Ambient y Patrimonio Rural, quiere fomentar os recorrius interpretativos meyoambientals que se fan en tot-terreno por l’entorno natural d’o municipio, “un d’os mas ricos en diversidat ambiental de toda Europa”, destacó o concellero de Meyo Ambient d’o consistorio turiasonense, José Luis Martínez.

Martínez explicó que l’obchectivo d’ista actividat “ye completar a extraordinaria ufierta turistica que tien a ciudat, promocionando tamién o turismo de naturaleza y prebando d’atrahier nuevos visitants”.

En ixe sentiu, o monitor meyoambiental, Andrés Omeñaca, apuntó que “o termín municipal ocupa mas de 24.000 hectarias y en una distancia record de 20 kilometros tenemos un desnivel muit pronunciau de quasi 2.000 metros, o que propicia que en iste curto recorriu podamos trobar estepas, sotos, ambients rupicolas, campos de cautivo, xarramatas mediterranias con tremoncillos, aliagars y coscolleras, carrasqueras, caixigueras, abedulars, fayars, piornals, u  pineras, estando iste zaguer grupo, as coniferas, basicament os unicos arbols aloctonos d’os nuestros monts”.

Omeñaca resaltó tamién que “o Parque Natural d’o Moncayo alberga, entre atras singularidatz, un d’os fayars mas meridionals d’Europa, un d’os tasos abedulars d’as nuestras latitutz y quantos endemismos botanicos y faunisticos muestra de l’isolamiento que afecta a os animals y plantas que medran en iste singular espacio natural”.

“Asinas, en cadagún d’istos ambients trobamos una flora y una fauna caracteristica de cada ecosistema por o que a diversidat biolochica ye sorprendent. Ye a ornitofauna especialment variada, o que fa d’o nuestro patrimonio natural un puesto excepcional ta la practica d’a ornitolochía u Birding como se conoixe en Anglaterra y que tantos seguidors tien en Europa y en tot o mundo”, indicó o monitor.

Tres visitas interpretativas

D’ista forma, ta prebar d’amostrar ista riqueza meyomabiental, o Concello ufre tres visitas interpretativas: una que amuestra os ambients esteparios con que cuenta Tarazona en o parache de Valcardera, a tasos 400 metros d’altitut; una segunda que recorre os sotos y conglomeraus d’os ríos Val y Queiles; y o tercer discurre por o Parque Natural de Moncayo a traviés de selvas mediterranias y atlanticas.

As visitas se pueden solicitar qualsiquier día d’a semana y se realizarán preferentment de maitins, estando convenient reservar-las con uns días d’antelación. O Concello cuenta con un vehíclo 4×4 con una capacidat de dica ueito plazas.

Ta grupos mayors, y de traza excepcional, podrá acompanyar a o vehíclo oficial unatro particular por cuenta de l’interesau pagando os suyos ocupants como a resta. Os recorrius tienen una duración de quatro u cinco horas, realizando-se numerosas aturadas en zonas estratechicas. Encara que a visita d’o Val y Queiles s’ufre como ruta ornitolochica, en as tres visitas s’alufran numerosas aus de toda mena.

Fuent: http://www.cronicadearagon.es/wordpress/?p=39579

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.