Tarazona floreix con a suya seo enguerada

Os Principes d'Asturias acudión a la devantadera d'a Seo turiasonense.

Devantadera d'a Seo de Tarazona (Foto: Aragonhoy.net)

Tarazona vivió ahiere un d’os suyos días grans. A Seu de Santa María de l’Hortal, considerada como a Capiella Sixtina d’o Renacimiento estatal, ya ye oficialment feita enguerada diez meses dimpués d’a suya reobridura. Os Principes d’Asturias presidión l’acto de devantadera que congregó a cients de turiasonenses a las puertas d’iste templo de mas de 800 anyos d’historia.

Don Felipe y Donya Letizia plegón a las 12.15 horas en a plaza d’a Seo an estión recibius por a presidenta d’Aragón, Luisa Fernanda Rudi; o president d’as Cortz d’Aragón, José Ángel Biel, y l’alcalde de Tarazona, Luis María Beamonte;

entre atros representants politicos y eclesiasticos. Dimpués de recibir l’amorosidat d’os vecins y conversar con ells, s’endrezón a la puerta prencipal an l’obispo de Tarazona, monsenyor Eusebio Hernández, les dió a bienplegada. Ya aintro, o Principe se retrobó con a seo dotze anyos dimpués que la visitase quan yera en pleno proceso de consolidación. Alavez ya s’intresó por a suya estructura “quedando impresionau por o sistema hidraulico que sostiene l’edificio y avido de veyer culminada a obra de restauración”, seguntes remeró entre a homilía l’obispo de Tarazona.

A seo, considerada como un d’os eixemplos d’o gotico francés que mezcla amás elementos renacentistas y mudeixars, ha estau sozmetida a un proceso de restauración que ha durau tres decenios. Plegó a incluyir-se en a lista de seos en periglo y muitos temioron por a suya conservación, pero a seo turiasonense aconsiguió salvar a suya vida recuperando asinas a suya valor como alfaya d’o mudexar. Por ixo, como destacó monsenyor Eusebio Hernández, “hue ye un día gran ta tot Tarazona y redolada” porque a restauración ye “un escayecimiento de gracia ta toda la diocesi”, amás d’estar “un motivo de argüello y de viva satisfacción ta tot Aragón y toda Espanya”.

L’obispo definió a la seo como una “alfaya d’arquitectura, pintura y arte, fruito d’a fe profunda, de gran sensibilidat espiritual y d’un formidable talento artistico” ta continar sinyalando que templos como iste “han marcau fundament a historia, a cultura y a fisonomía d’as prencipals ciudatz d’Europa”. Encara que advertió que quedan grans obras por fer como a restauración de capiellas, l’atrio u o claustro, agradeixió a aquells gubiernos y institucions que entre 30 anyos han feito posible economicament ista “marabillosa realidat” como os Gubiernos d’Aragón y Espanya; a Deputación Provincial de Zaragoza; a Conferencia Episcopal Espanyola; a Fundación Tarazona Monumental; o BBVA, a CAI y Ibercaja.

Dimpués de l’Au María y de contemplar un video sobre a evolución d’as obras, os Principes visitón o templo, acompanyaus por representants institucionals y os arquitectos y responsables d’o Plan Director, Fernando Aguerri y José Ignacio Aguerri. Se detenión especialment en o cimborrio, una d’as piezas mas caracteristicas de l’edificio por a suya orichinalidat y o suyo coloriu. Tiene especial valura porque os treballos de restauración deixoron a o descubierto un conchunto de figuras humanas espulladas por as quals le han acunyau o termin de Capiella Sixtina d’o Renacimiento estatal. Tamién alufrón atras estancias como o coro, as capiellas, o claustro, a Capiella Mayor, qualas pinturas en a boveda son una d’as millors alfayas d’a seo, y o Retablo Mayor.

Ya en a capiella de Santo Andrés, Don Felipe y Donya Letizia sinyón en o libro d’honor y replegón quantos obsequios como un relieve en plata d’a frontera d’a seo y unatro d’o Concello y un plato de ceramica de Muel. Dimpués de saludar a atros obispos asistents a l’acto, entre os quals se trobaba l’arzobispo de Zaragoza, Manuel Ureña, se tresladón a o Palacio d’Eguarás an se reunión con o teixiu social y economico d’a ciudat y d’a redolada.

Devantadera d'a Seo de Tarazona (Foto: Aragonhoy.net)

Fuent: http://www.comarcas.es/index.php/mod.noticias/mem.detalle/idnoticia.6673/relcategoria./chk.7ca2f66478ef32f181115ba5ccfa19e2.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.