Tensión y desaloixos en o Pirineu por a fuerte creixida d’os ríos

As plevias d'o temporal ha feito creixer exponencialment os ríos, mas que mas a Esera y a Garona. I ha habiu desaloixos y danyos materials pero no pas humanos

Esera en Benás

A Esera en Benás. Foto: InfoBenasque (https://twitter.com/InfoBenasque)

O temporal que ye pasando por Aragón dende ahiere ye deixando a-saber-la de plevia en muitos puestos d’o Pirineu. O cabal d’o río Esera ha creixiu con fuerza y, seguntes a Confederación Hidrografica de l’Ebro (CHE), ha pasau d’os 258 hm cubicos por segundo, plegando a sobrepasar os 4 metros d’altaria, deixando isoladas as localidatz de Benás y Castillón de Sos.

As carreteras d’acceso a istas poblacions, A-139 y N-260, han quedau engaronadas por bells puntos, en o Congosto d’o Ventamillo, y en puntos entre Campo y Castillón de Sos y entre Grist y Benás. L’entibo de Pasonuevo preba de desentibar augua, pero no adube debiu a l’alarmant cabal d’augua. Asinas mesmo preban de desentibar tanto l’entibo de Bubal como Lo Grau. Mediano y Yesa, pero i entra muita mas augua d’a que en sale. A CHE advierte que as plevias podrían continar de tardes con mas fuerza.

cubillar cazataires

Cubillar de cazataires en Benás. Foto: InfoBenasque (https://twitter.com/InfoBenasque)

Han estau desaloixadas unas 50 personas que habitaban un bloque de viviendas en a carretera d’acceso ta Benás por a creixida d’a Esera, espaldando-se un d’os muros de contención de l’edificio. L’edificio Estós d’o Cabo la Vila ha puesto quedar danyau y se teme que pueda espaldar-se. O cubillar de cazataires de Benás tamién ha sufriu danyos.

Un muro de formigón s’ha espaldau amán d’o río Esera en Benás, habendo d’estar rescatau un vecín que ha cayiu en o cauz d’o río, y o Concello ha ordenau evacuar a carrera Mayor, l’Avda. Los Tilos y a carrera Borobones a on o río s’ha desbordau. A población evacuada ha d’ir t’o poliesportivo d’a localidat y no se permite que garra persona s’amane t’o río. Amás se recomienda de no beber augua d’a cheta en no funcionar a depuradora, amás de pillar velas y linternas debant d’a posibilidat d’una avería electrica. O concello de Benás, seguntes informa Aragón Radio, ha demandau aduya a la Unidat Militar d’Emerchencias (UME), que se ye posicionando en a localidat de Graus.

Unas diez personas son isoladas en Plans de l’Hospital en quedar-se engaronada a carretera. Plantan bien pero podrían estar desaloixaus si a situación contina empiorando.

En Castillón de Sos ha estau desaloixau un camping con ninos y ninas plegaus de Zaragoza y se les ha realoixau en un centro cultural. Asinas mesmo, as escuelas d’infantil y primaria d’a localidat han estau evacuadas tamién. Ta hue s’aspera que continen as fuertes plevias, estando en alerta narancha por tronadas en tot o Pirineu.

En Grist os bombers han habiu de desaloixar a bells vecins de casa suya en engaronar-se. O puent enta Ancils ha cediu y ha estau arrocegau por a corrient. Ancils ye en grau risque d’engaronar-se.

En atros puestos d’Aragón, como as Cinco Villas, tamién son creixendo con fuerza os cabals d’os ríos, pero por agora no s’han produciu incidencias. En Chaca os bombers son achiquindo augua de bells edificios, entre ells comercios. En l’hotel de Pandicosa s’han engaronau os baixos pero sin mas incidencias. O diario Alto Aragón informa de que a Cinqueta ha arrasau un troz de carretera d’1 km de longaria entre Plan y Sant Chuan de Plan.

Puent Artiés

O puent d’Artiés ye arrasau por a Garona. Foto: @gmrocher

Tanimientres, en a vecina val d’Arán se vive una situación tamién complicada. O río Garona y os suyos afluents, especialment o Nere, s’han desbordau. L’augua ha arrasau puents en Salardú y Artíes, y os entibos no pueden contener mas augua y puya por dencima d’os muros d’os mesmos. A carretera de Bossost ye tallada, asinas como todas as comunicacions. L’alcalde d’Arán, Carles Barrera ha recomendau a os vecins y vecinas que eviten desplazar-se por a redolada y se metan a salvo. Muitos habitants d’a val son sin augua y sin luz y o Consello Cheneral d’Arán ha suspendiu o suministro de gas.

A carretera N-240 ye tallada y s’han suspendiu as clases, amás de desaloixar-se a unas 400 personas en Les, Artiés, Viella y Bossost. O Consello aconsella de no salir de casa, no fer servir ascensors, acumular augua potable y disponer de batería en os mobils. A Generalitat de Catalunya avisa de mas evacuacions.

Tamién a situación se complica en os ríos Noguera-Pallaresa y Noguera-Ribagorzana.

Tanimientres, tamién por a creixida d’a Garona, informan dende Jornalet en Occitania, d’a evacuación de centenars de personas de Sant Beat, Banhèras de Luishon, Sales e Pratvièlh y Hòs. As carreteras RN125, RD46, RD618A y RD27C son zarradas.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.