Teruel aculle o III Certamen de Composición de Mosica Popular Aragonesa

O ganador s'esleixirá en un concierto que se ferá en a Plaza d'a Catedral ta setiembre

Presentación d'o certamen

Presentación d’o certamen

A ciudat de Teruel acullirá o venient mes de setiembre, coincidindo con as Fiestas d’a Magra, o III Certamen Nacional de Composición de Mosica Popular Aragonesa Comarca Comunidat de Teruel. Se tracta d’un concurso que organiza l’Asociación Gaiteros de Aragón “Con- Partita” con a colaboración d’o Concello, a Comarca y a Diputación Provincial.

L’obchectivo d’o certamen ye fomentar y espardir a mosica popular aragonesa en a modalidat de nuevas composicions dedicadas y motivadas por os compositors a os lugars que fan parte d’a comarca.

“Con iste concurso plegamos en varios obchectivos, como promover a mosica tradicional aragonesa y promocionar os nuestros lugars culturalment y turistica”, sinyala o president d’a Comarca Comunidat de Teruel, Joaquín Juste

O plazo ta presentar as melodías remata o 20 de chunio, y cada autor puet presentar-ie un maximo de cinco composicions. Se repartirán un total de 1025 euros en premios: 300 t’o primer premio, 200 t’o segundo y 125 t’o tercer en a categoría ordinaria, más un premio extraordinario dotau con 200 euros t’a millor composición medieval adedicada a Las Bodas d’Isabel y atro premio de 200 euros t’o millor apanyo de qualsiquier composición que ya exista aintro d’a comarca. A istos premios tringo-tringo, se i sumarán os premios en especie d’os productos donaus por un gran numer d’interpresas aragonesas que refirman iste certamen.

D’entre totz os participants o churau en trigará ueito finalistas que actuarán en a Plaza d’a Catedral o domingo d’as Fiestas d’a Magra, ta setiembre, y se i esleixirán os ganadors.

Iste certamén naixió en desapareixer o concurso que se fació mientres siet anyadas en a Comarca de Belchit. A primer edición se fació en Zaragoza, a segunda en Sobrarbe y ista tercer en Teruel, adhibindo novedatz en cada edición. Seguntes informa a organización, l’anyada pasada, 700 personas estioron en o concierto a on que se trigoron os ganadors. Antimás, cada anyada, s’edita un disco con parte d’as composicions presentadas a o concurso que dimpués s’esparde por colechios y bibliotecas d’a comarca que pertoque.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.