Teruel celebra a Semana d’a Bicicleta d’o 12 t’o 18 de mayo

Rematará o domingo con a participación d'un millar de personas en o DIya d'a Bicicleta

Presentación d'a Semana d'a Bicicleta

Presentación d’a Semana d’a Bicicleta

Con l”obchectivo de fomentar l’emplego d’a bicicleta como meyo saludable y sostenible, con as maximas guarancias de seguridat y cumplindo con a legalidat, se celebra la semana d’o 12 t’o 18 en Teruel a semana d’a bicicleta. As actividatz programadas ta istos diyas s’han presentau iste martes por o conceller de Trafico y Seguridat Ciudadana y o intendent chefe d’a Policía Local.

En os centros escolars, se ferán actividatz que asperan plegar a más de 3.000 alumnos y alumnas. Tamién, de conchunta con a Universidat, se ye fendo una enqüesta ta conoixer os costumbres en a movilidat d’os suyos estudiants. “Os resultaus serán prou importants a l’hora de planificar futuros carrils bici, ya que una infraestructura ye buena si se fa servir”, han explicau en a rueda de prensa.

 A programación tamién incluye una charrada, aintro d’o programa Life+ de recuperación de l’aria natural de Las Arcillas, titolada “Bicis y ciudatz”, que ufrirá Fernando Mafé, responsable de comunicación d’o colectivo “Valencia en bici”. Antimás, en a Feria Juventud Activa” se ferán actividatz relacionadas con a bicicleta, como un taller d’apanyos de chicotas averías.

Ta rematar, o conceller ha indicau que no se ferá la prebatina prevista d’un carril bici provisional dende o Parque d’os Fueros dica Los Arcos “por motivos de seguridat y de legalidat”, ya que o recorriu pensau en primeras por as rondas no tien os requisitos minimos de seguridat si no se fan obras, y ixo no ye posible ta una prebatina d’una semana. Se pensó en un recorriu alternativo por as carreras d’o centro historico, pero en ixos diyas salió a sentencia d’o Tribunal Supremo por os carrils bici en as ceras de Zaragoza que vulcó ixa segunda posibilidat. Debant d’a posibilidat de que podese haber-ie un accident por manca de seguridat u que estasenos incumplindo a lei, hemos decidiu no fer a prebatina y asperar a viyer como evoluciona l’aplicación d’a sentencia d’o Tribunal Supremo en as ciudatz afectadas t’actuar en conseqüencia”, remata.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.