Teruel a rebutir en as “Bodas de Isabel”

A ciudat se plena en a recreyación d'o suyo pasau meyeval

Os amants de Teruel en a zaguer scena

Os amants de Teruel en a zaguer scena

A ciudat de Teruel ha tornau iste cabo de semana t’o sieglo XIII con a celebración d’as ya tradicionals Bodas de Isabel. Mientres quatre diyas totz os habitadors y visitants s’han chupiu d’a historia d’a villa y d’o reino, en un ambient festivo de tot. L’orache, antimás, ha acompanyau en un cabo de semana que, por un regular, gosa d’estar muito más fredo.

Con a muerte de Isabel, dimpués d’haber-le negau un pochón a Diego, o suyo aimor, remataba a historia d’o Amants de Teruel que se ha recreyau en istos diyas. Miles de personas empliban a Plaza d’as marquesas ta viyer o suyo funeral y ascuitar o romance d’a historia d’os amants y a canta que se fa dimpués dende ya fa bellas quantas anyadas. En rematar, a la chent que bi yera se les ha convidau a besar-se en remerando l’amor que se teneban Diego y Isabel. Asinas remataban os zaguers actos que heban prencipiau a nueit d’o chueves con o falso anuncio d’a muerte de Diego.

Dende a nueit d’o chueves dica o meyodiya d’o domingo bi ha habiu arrienda actividatz de toda mena. Dende recreyación de barallas y luitas dica actividatz ta conoixer os astros, fer ixabón, exhibición de cetrers, …. Tot prou que sí, acompanyau con muita virolla en os bars y restaurants d’a ciudat y en os puestos instalaus por tot lo casco urbano y con os conciertos de Street Wings y Lurte.

Os teruelanos s’han tornau a embrecar de tot en as organización d’as Bodas instalando as haimas d’as collas y participando de tot en as representacions teatrals que bi ha habiu a todas horas por toda a ciudat. Os esleixius ta fer de Isabel y Diego son estaus Laura Martínez, una profesora d’anglés de 29 anyadas y Imanol Pérez, un inchenier tecnico de 28.

Tanto a propia ciudat como muitos lugars d’a redolada y mesmo aluenyaus, ha rebutiu de turistas y visitants que han quiesto compartir a historia d’os amants. Dende fa meses yera dificil de trobar bella cambra libre u bell puesto ta dormir. L’orache ha acompanyau en unas calendatas por un regular prou fredas, pero que permitiban que iste domingo muitos s’estasen chentando en o sol que calentaba lo meyodiya teruelano.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.