Toda la oposición deixa la ponencia d’a lei de no luengas

Dimpués d'as parolas d'a coordinadora d'a ponencia, Maria José Ferrando, todas as collas parlamentarias demandoron que se le sustituyise

Reunión d'a ponencia (Foto: Cortes d'Aragón)

Reunión d’a ponencia antis de marchar a oposición (Foto: Cortes d’Aragón)

A ponencia que ha d’estudiar y debatir a reforma d’a lei de luengas no ha puesto continar iste maitin como yera previsto. Os tres partius d’a oposición en as Cortz han decidiu d’albandonar a ponencia. Asinas, no se cumple o regle ta continar con a ponencia que diz que han d’estar-ie representaus a metat más uno d’as collas parlamentarias.

Ista decisión la han preso dimpués de no cumplir-se a demanda que facioron os tres partius (PSOE, CHA y IU)  de que se cambiase a la coordinadora d’a ponencia Maria Jose Ferrando, d’o PP, u retificase en as suyas parolas. O cambio se demandaba dimpués d’as polemicas parolas d’a diputada a on que descalificó as esmiendas d’a oposición decindo que se quereba plenar tot de “pinganillos”, que caldrían 1400 traductors y que as esmiendas costarían decenas de millons d’euros, tot sin alportar datos ni estudios.

Os tres partius d’a oposición han coincidiu en criticar “a manca de dialogo” que bi ha habiu en a ponencia y en que os partius que refirman a o gubierno, PP y PAR, no quereban que “pasar o ruello”. Maria Jose Ferrando, d’atra man, les ha acusau de “manca de talant democratico” y s’ha endrezau a lo PSOE ta decir-le que va “a remolque de CHA y IU”. En un comunicau, a diputada d’o PP no solo no ha rectificau, sino que ha tornau a calificar de “malfurrie economico” as esmiendas presentadas por as tres collas d’a oposición y contina sin reconoixer, como fa toda a comunidat scientifica mundial, a existencia de l’aragonés y o catalán en Aragón, referindo-se siempre a istas luengas como “lo que claman fabla (sic) y catalán”.

A tamás d’isto a modificación d’a lei continará o suyo curso, pero en organos diferents, habendo de debatir-se en a Mesa d’as Cortz y en a de Educación, Cultura, Universidat y Esporte.

 

2 Rispuestas a Toda la oposición deixa la ponencia d’a lei de no luengas

  1. Pingback: Toda la oposición deixa la ponencia d’a lei de no luengas en as Cortz d’Aragón | AraInfo | Achencia de Noticias d´Aragón

  2. Ye curioso que ista siñora s’apellide Ferrando. De seguras que no sape que o suyo apelliu ye en “lo que llaman fabla”

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.