Torna a eslizar-se una ladera en Yesa

Río Aragón reclama o cese de l'incheniero d'as obras y l'aturada d'o prochecto de recreiximiento de l'entibo

Foto: Rio Aragón

Foto: Rio Aragón

Iste zaguer cabo semana, a ladera cucha de l’entibo de Yesa ha tornau a eslizar-se, a tamás d’o bulonau y formigonau que s’heba realizau en ixa zona fa menos d’un anyo. O movimiento de tierras s’ha produciu uns 200 metros auguachinas abaixo d’a presa, deixando en evidencia, seguntes l’Asociación Río Aragón que denuncia o feito, as “solucions” d’a CHE. A inestabilidat que puede veyer-se en as imachens feitas por “Río Aragón” no deixan puesto a dubdas. O president de Rio Aragón, Miguel Solana, esplanica que puede dicir-se “que antes u dimpués tot l’hormigón y os bulones colocaus en ixa zona se vendrán abaixo”.

Seguntes Solana, “ye alarmant a incompetencia d’iste organismo. Dimpués de negar entre anyos que en as laderas de Yesa i hese problemas, habioron de reconoixer as dificils condicions d’a cerrada de Yesa, dimpués de producir unatra eslizadera en 2006. Isto ye bella cosa que sabeba muit bien René Petit, l’incheniero director de l’actual presa fa 50 anyos”. L’estudeo dimpués d’ixe feito costó un millon d’euros y deciba que caleba tirar abaixo a ladera. Solana diz que “quan toda una montanya se quiere mover no ye pro con fer un lavau de cara. Ye d’o tot indiscutible que toda a ladera s’esliza y pretender ignorar-lo u privar-lo solament ye propio d’a fateza humana”.

L’asociación dimpués d’iste escayecimiento, reclama que s’ature antis con antis una obra que “se ye convertindo en un desproposito mayusclo. Desgraciadament muito nos tememos que a respuesta d’a CHE será mas formigón, mas fierro y mas diners de totz”.

En istes momentos o presupuesto de Yesa ya triplica l’inicial (300 millons, PGE2012), por o que podría plegar dica os 400 u 500 millons. Seguntes Río Aragón “Yesa pareixe estar a sola gran aspiración d’Aragón ta uns gobernants que no son capables d’ufrir solucions realistas y utils a las verdaderas necesidatz d’a sociedat aragonesa”. Contina dicindo Río Aragón que “a chestión d’o prochecto de recreiximiento de Yesa ye deixando en evidencia a l’incheniero director d’obras Sr. Núñez, que ye costando-nos decenas de millons d’euros a os ciudadans. Habría d’estar cesau de forma fulminant y substituiu por belún que se dedique a intentar limitar as succesivas esferras producius por a suya chestión, y dimpués caldría abandonar definitivament o prochecto de recreixer l’entibo”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.