Torna “D’estrela a estrela”, tot un diya de radio en aragonés

En ista tercer edición, bi habrá programación en aragonés mientres más de quince horas

cartelPor tercer anyada, Radio Topo torna a empentar iste sabado a chornada “D’estrela a estrela”, tot un diya de programación a on que l’aragonés, y en menor mida, o catalán, será a luenga de comunicación. Más de quince horas d’emisions a on que os principals programas d’a emisora libre ferán os suyos contenius en aragonés.

En un anyo prou furo ta l’aragonés, por a lechislación que contra ista luenga ha plegau dende o Gubierno d’Aragón, Radio Topo reivindica a luenga y esfiende que “as leis podrán tallar as flors, pero nunca no a pri­ma­vera, por­que l’aragonés ye a nues­tra matria y cada parola ye casa nuestra.” Iste anyo, antimás, a Radio ye celebrando o suyo vinteno cabo d’anyo.

En as 15 horas d’emisión se podrán trobar especials en aragonés d’os programas de Radio Topo El Rocktubernio, El Kantamañas, La Enredadera (A Liedrera), Rueda Libre, El Acorazado Topemkin, El Acratador (L’Acrataire), Skándalo en las ondas, Ciutat Podrida, Lucha Libre y Electrokrazia. Y prou que sí, Fendo Orella en aragonés como siempre.

Antimás d’os programas propios d’a emisora, a ista tercera emisión se i adhiben atras Radios Libres d’a ciudat como La Granja y MAI. Cal destacar tamién que, por primer anyo, bi habrá participación internacional: FSK Hamburg encetará a emisión d’iste D’estrela a estrela con o programa Ale-manya. L’alumnalla de segundo curso d’a escuela d’aragonés Nogara, tamién i tendrá, por primer anyo, un espacio a on que ferán servir os conoiximientos que son aprendendo.

Os organizadors claman antimás a la participación d’a chent, ta que escriban por mail u griten a la radio (976 29 13 98) mientres a emisión t’alportar-ie as suyas anvistas sobre l’aragonés y as luengas minorizatas. Radio Topo se puet ascuitar a traviés d’o 101.8 d’a FM, u en o streaming que fan dende a web de Radio Topo.

 

 

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.