Torna ta Zaragoza a Muestra Internacional de Cine Realizau por Mullers en a suya deciseisena edición

O Centro d'Historias aculle una nueva edición d'ista muestra que quiere fer vistero o cine femenino y feminista realizau por mullers

Cartel: Julia Nada

Cartel: Julia Nada

Son ya, con a edición d’estianyo, deciséis as edicions d’a Muestra Internacional de Cine Realizau por Mullers de Zaragoza, que se celebrará entre o sabado 18 y o sabado 26 d’iste mes d’octubre. Organizau por o Seminario Interdisciplinar d’Estudios d’a Muller (SIEM) y l’Asociación Cultural Odeonia, a muestra, que pretende fer vistero o cine dende una optica femenina y feminista, s’enguerará o sabado 18 con a pelicula “Young & Wild (Joven y Alocada)” d’a directora chilena Marialy Rivas, premio a o millor guión en o festival de Sundance 2012.

Tamién bi ha puesto pa “operas primas”: “Nana“, de Valérie Massadian, “Marieke” de Sophie Schoukens, con a colaboración de l’Instituto Francés, arribará t’o festival “Notre étrangère” de Sarah Bouyain, y “La Plaga“, d’a catalana Neus Ballús.

Dende puestos mas leixanos, plegará, d’a man d’o club esportivo Elaios de lesbianas, gais, bisexuals y transexuals de Aragón, a pelicula “All she can” que reconta as dificultatz d’una estudiant latina en un lugar mugant entre Mexico y Estaus Unius.

Os documentals realizaus por mullers tamién tien o suyo apartau, con un fuerte sentiu social. “Estudiar en Primavera“, d’Amparo Fortuny, documental sobre a “Primavera Valenciana” de 2012; “Visto para sentencia“, d’Azahara Fuentes, sobre o caso de Rodrigo Lanza, que estió engarcholau cinco anyos por un delito que no cometió; “Agnus Dei, cordero de Dios“, d’Alejandra Sánchez, sobre a pederastia en a Ilesia Catolica; “Dos once: esta Matria se construye después de perder el miedo“, d’Elena Pollán, sobre o colectivo de mullers, lesbianas y travestis en Archentina; y “Tomar el escenario“, d’Elena Idoate, que analisa a presencia d’a muller en a mosica alternativa.

Tamién a historia d’o sieglo XX i será present: a luita guerrillera contra o franquismo en “La isla de Chelo” d’Odette Martínez, Laetitia Puertas e Ismaël Cobo; a luita d’as Mais d’a Plaza de Mayo en Archentina, “Abuelas: Grandmothers on a Mission” de Noemí Weis; a directora Mai Masri, con a colaboración d’a Casa Arabe, nos amanará a figura de Hanan Ashrawi, academica, activista, portavoz palestina en os procesos de paz de Washington y diputada en o primer Parlamento palestino; y conoixeremos tamién a figura d’Audre Lorde “Audre Lorde, The Berlin Years 1984-1992“, que zarra a muestra.

Y en l’apartau de curtometrache, un chenero que va creixendo, destacar a presencia de directoras noveles y ya experienciadas, tanto d’o cine como d’a televisión. Podrán veyer-se curtos como “La Boda” de Marina Seresesky u “Ojos que no ven” de Natalia Mateo, nominadas a os Goya 2013. Tamién curtos aragoneses con sabor femenino: “Ahora, no” d’Elia Ballesteros; “Cosetas d’adentro” de Lola Gracia, curto en aragonés baixo-ribagorzano; “Chan Chan” de Pilar Palomero; y os curtos y documentals “Científicas que dejan huella“, “Una transición en femenino“, “Videocarta con amiga” y “Feministas Indignadas“.

As proyeccions se realizarán en o Centro d’Historias de Zaragoza (Pza. S. Agostín, 2), encara que tamién bi habrá bell acto en o CSL La Pantera Rossa (C/ S. Vicent de Paúl, 25) y a Sala Arrebato (C/ Palafox, 28) do se celebrará una fiesta-audición en colaboración con Febrero Feminista con motivo d’a presentación d’o documental “Tomar el escenario”.

Pa mas información sobre a programación y horarios, puede viyer-se o programa aquí.

Una rispuesta a Torna ta Zaragoza a Muestra Internacional de Cine Realizau por Mullers en a suya deciseisena edición

  1. Pingback: Torna ta Zaragoza a Muestra Internacional de Cine Realizau por Mullers en a suya deciseisena edición | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.