Tot presto t’a vada cheneral

Organizacions sindicals y socials claman o miercols t'a vada cheneral

Cartels clamando a la vada en Zaragoza

Cartels clamando t’a vada en Zaragoza

Ni se treballa ni se consume” ye un d’os lemas que se repiten en os cartels, pasquins y publicidat d’as organizacions que son clamando ta refirmar a vada cheneral convocada ta iste miercols 14 de noviembre.

Os sindicatos, mareas y atras organizacions ya son parando as movilizacions y piquetes que saldrán t’a carrera maitin. Ta ista convocatoria, antimás d’as organizacions sindicals se i han adhibiu atras como as “mareas” – movimientos asambleyarios de luita sectorial-, sectors ecolochistas, partius politicos, organizacions estudiantils, … Os motivos t’a vada cambean bell poco seguntes a organización, pero l’alcuerdo más cheneral ye d’oposar-se a midas como as retalladas en sanidat, educación u lechislación laboral, y a situacions como a d’os esqueferaus u a los desahucios, qüestion que se ye negociando en istos diyas de man de PSOE y PP. Tamién se demanda, por eixemplo, un referendum ta refirmar u refusar a politica economica y social d’o gubierno espanyol. No falta atras reivindicacions com a de no pagar una deuda que se considera ilechitima u as historicas como lo chornal social u a chornada de 35 horas semanals.

Vada de consumo y de cudiaus

As trazas d’entender as vadas van cambiando y, tanto en ista como en l’anterior vada d’o 29 M, dende muitas organizacions se fa un clamamiento a que a vada vaiga dillá de deixar de treballar. Por ixo tamién se convoca una vada de consumo, ye decir, se convida a que no se vaiga ta botigas, bars u mercaus, ni se gaste luz ni augua si no ye menister u midas parellanas. De man de colectivos feministas más que más, se proposa a vada de cudiaus con que se quier fer vistero tot lo treballo que gosan fer as mullers arredol d’os cudiaus d’a parentalla. O clamamiento ye a deixar de fer fainas como fer a lavadora, escoscar a casa u fer a chenta encara que atras como l’aduya a los más dependients siga imposible de deixar de fer-las.

Cobertura informativa

Dende Arredol, iremos informando tot lo diya d’os acontecimientos que vaigan pasando por tot lo país y d’as qüestions más importants d’a resta d’Europa. Igual como en atras vadas, s’ha creyau un hashtag que permitirá a los usuarios de Twitter seguir l’actualidat tocant a la vada en Aragón y que ye #vada14N. Atros meyos aragoneses con licencia Creative Commons, como Arainfo u Radio Topo, tamién ferán servir ixe hashtag y darán cobertura en directo de tot lo relacionau con a vada.

Convocatorias en Europa y America latina

Antimás de en l’Estau espanyol, a vada ye convocada tamién en Portugal y Grecia. En Italia bi habrá un ature de quatre horas y en atros estau europeus s’han convocau actos de protesta por as politicas economicas y en solidaridat con os vaders d’o sur europeu. Tamién t’America latina plegan os clamamientos de protestas. A Confederación sindical de Treballadors y treballaderas d’as Americas, a on que bi ha representadas 53 organizacions de 23 países, ha convocau accions y movilizacions debant d’as embaixadas europeas y de interpresas d’estaus europeus. O suyo obchetivo ye d’amostrar asinas a suya solidaridat con o sindicalismo europeu y o suyo refús t’as politicas de retalladas.

Por tot lo país s’han convocau actos de refirme a la vada: manifestacions, piquetes, concentracions, caceroladas u os bicipiquetes que recorrerán as carreras de Uesca y Zaragoza, igual como en anteriors vadas. Os horarios de beluns d’os actos son contino:

Uesca

7.00 y 9.30 horas. Piquete ciudadano y creyativo, salida en Plaza de Navarra

10.00 horas. Bicipiquete, salida en Plaza de Navarra

12.00 horas. Manifestación, salida en Plaza de Navarra

14.00 horas. Chenta popular, a pur d’alportacions, en o Parque “Las Pajaritas”

16.30 horas. Bicipiquete, salida en Plaza de Navarra

19:00 horas. Manifestación, salida en Plaza Zaragoza (UGT y CC.OO)

19.30 horas. Manifestación, salida en Plaza de Navarra (Asambleya Ciudadana de Uesca)

 

Teruel

11.30 Manifestación dende o Campus Universitario (Asambleya d’Estudiants)

19.00 Manifestación dende a Plaza d’a Catedral

 

Zaragoza

07.30 Salida d’o bicipiquete dende a plaza d’o Pilar

09.00 Columnas d’o 15M dende os vicos de Delicias, O rabalete – Sant Chusé, As Fuents, L’Almozara, O Gancho y Torrero.

10.00 Piquete “Hoy no se estafa” de Stop Desahucios en a Plaza d’o Pilar.

10.00 Marea Blanca Sanidat. Hespital Clinico.

11.00 Reunión de mareas y bloques criticos en a Plaza Sant Francho.

12.00 Reunión de mareas y bloques criticos en a Plaza Espanya.

14.00 Chenta popular en a Plaza d’o Pilar.

18.00 Manifestación de CNT, CGT, SOA, Intersindial y CATA dende a Plaza Reina Sofía.

19.00 Manifestación de CC.OO y UGT dende a Plaza Paraíso.

 

Calatayú

12.00 horas. Manifestación dende a Plaza d’o Fuerte

 

Alcanyiz

12.00 horas. Concentración en plaza Espanya

 

Balbastro

18.30 horas. Concentración-cacerolada en “Jardinetes”

 

Monzón

12.00 horas. Concentración en a Plaza d’o Concello

19.00 horas. Manifestación dende a Plaza d’a Mosica

 

Chaca

12.00 horas. Concentración en Plaza Marqués d’aa Cadena

14.30 horas. Marea Verde por a Educación debant d’o concello

20.00 horas. Manifestación en La Plaza Biscós

 

Samianigo

20.00 horas. Manifestación dende a Plaza Espanya

 

L’Aínsa

11.30 horas. Manifestación dende a parti d’o mercau dica la Plaza.

 

Fraga

12.00 horas. Concentración en a “Plaça d’Espanya”

 

Caspe

19.00 horas. Manifestación dende carrera Barcelona

 

Tarazona

18.00 horas. Manifestación dende a Plaza Sant Francho

 

Exeya

19.00 horas. Manifestación dende a Plaza de Toros

 

Binefar

19.30 horas. Manifestación dende a Plaza Espanya

 

Sarinyena

11.00 horas. Marea multicolor concentración en tres puntos: Colechio, Instituto y Centro de Salut.

11.30 horas. Salida d’as tres marchas y recorriu urbano

12.00 horas. Concentración (cacerolada/chiflada) en Plaza d’o Concello

 

Castilló de Sos

11.00 horas. Concentración-cacerolada

 

Benás

12.00 horas. Concentración-cacerolada

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.