Transcendental partiu t’a permanencia d’Helios en División d’Honor

En Primera División femenina plega o derbi aragonés entre o CAI Santiago y o School Zaragoza.

Imachen d'o derbi entre o CAI Santiago y o School Zaragoza en a primera tornada. (Foto: Comunicación Tenis de Mesa)

Dimpués de l’aturón por a disputa d’o Torneu Estatal, iste cabo de semana torna a División d’Honor de tenis de mesa t’o C.N. Helios, encara que no t’o CAI Santiago, que tiene chornada de descanso. O conchunto heliofilo, que ha convocau a os habituals Alfonso Beamonte, Marcelo Toledo y Víctor Dobato, visita o domingo a pista d’o Y.T.M. Torrelavega en un transcendental partiu debant d’un rival directo por a salvación, que actualment ocupa plaza de descenso.

Si os zaragozans aconsiguen doblegar a o quadro cantabro ubrirían con ells una breca de tres triumfos que podría suposar un gran paso ent’a permanencia, mientres que una redota estreitaría as diferencias y amanaría periglosament a l’equipo aragonés a la zona calient d’a tabla.

D’atra man, en Primera División femenina plega o derbi aragonés entre o CAI Santiago y o School Zaragoza, que se disputará hué, sabado, dende as 17 horas en as instalacions d’o Club Esportivo Santiago. O School, lider en solitario d’o grupo, buscará revancha debant d’o CAI, o solo equipo que le ha redotau ista temporada y que repetirá o bloque d’a ida, formau por Sara Escota, Yara Grimal y María Vallepí. Entre as visitants no debutará a recientment fichada Noimot Olaide, por o que chugarán as titulars Marina Terrado, Paula Terrado y Elena Lozano.

En Segunda División masculina, o School Zaragoza recibe a o Vilafranca, en un important choque entre tercer y quarto clasificau. L’equipo zaragozano, que ha convocau a Felipe Contreras, Paul Delfont y Ricardo Pérez, tractará de vencer t’afianzar-se en os puestos de fase de puyada y aluenyar-se d’os catalans en a clasificación.

O Vilafranca aprofitará o suyo desplazamiento ta chugar tamién debant d’o CAI Santiago, que aliniará a o veterán Eduardo Ruiz, o suyo fillo Eduardo, Cristian López y Ricardo Giner, ta buscar un triumfo que les mantienga en a zona tranquila d’a tabla.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.