Tres imputaus dimpués de l’intento d’expropiacion d’Artieda d’o 10 d’octubre

Podria haber más presonas qui sigan gritadas a declarar debant d'a Guardia Civil espanyola, mientres que las asociacions paran a esfensa contra la enrestida chudicial

Vecins d'Artieda en a carretera t'o lugar

Vecins d’Artieda en a carretera t’o lugar

Dimpués de ser gritaus a declarar debant d’a Guardia Civil espanyola en Sos tres presonas han estau imputadas por haber estau presents en a carga policial en que remató a nueva prebatina d’a CHE de devantar actas d’expropiación en Artieda o pasau 10 d’octubre. A istas tres presonas, dos chovens d’Artieda y un miembro d’o Consello Executivo de Puyalón, se lis imputan varios delitos como “alteración del orden público”, “atentado contra la autoridad” y “lesiones”. Os tres han declarau de traza voluntaria en o cuartel d’a Guardia Civil espanyola en SOS iste maitín, dimpués d’estar avisaus con nomás que 24 horas d’antelación ta que se i presentasen. Txema Royo, miembro de Puyalón imputau, ha declarau que “ye increyible de tot que dimpués d’estar agredius en a carga policial, os mesmos que enrestioron contra nusatros agora quiera imputarnos delitos que no hemos feito“. Dende Río Aragón, o suyo vicepresident tamién imputau, Sergio Palacín, ha dito que “han amostrau as suyas cartas, as de prebar de criminalizar a una chent que nomás que queremos esfender o nuestro lugar y continar vivindo aquí

Pareixe, amás, que istos tres imputaus no estarán os unicos, y que as fuerzas de seguridat espanyolas tienen intinción de gritar a declarar a más chent y imputar-lis más delitos. En a concentración d’o pasau diya 10 d’octubre, s’arrocloron más de 200 presonas que viedoron o paso a os tecnicos d’a CHE que quereban devantar actas d’expropiación en o lugar. A Guardia Civil espanyol prebó de fer marchar a la chent que ocupaba la carretera de dentrada en Artieda con una carga policial que ha recibiu muitismas criticas por o desproporcionau d’a mesma contra chent que se i manifestaba de traza pacifica.

Una vegada que rematen istas actuacions policials o caso pasará a lo chuzgau de Exeya, que será l’encargau de dictar sentencia contra totz os imputaus. Debant d’istas actuacions policials y chudicials dende Coagret, l’asociación que luita contra os macroprochectos hidraulicos en Aragón s’ha convocau una trobada de todas as asociacions y entidatz implicadas en a esfensa d’o territorio ta prebar de concarar a enrestida chudicial.

Precisament hue, que a Guardia Civil espanyola gritaba a declarar a os tres primers imputaus, o president d’a CHE, Xavier de Pedro, feba un clamamiento ta “charrar con a chent d’Artieda” ta escar una solución a o conflicto.

Una rispuesta a Tres imputaus dimpués de l’intento d’expropiacion d’Artieda d’o 10 d’octubre

  1. Campo de Daroca

    Un orgullo poder ver que en Aragón aun quedan gentes con dignidad y con orgullo, y que empuñan la bandera para ejercer uno de los momentos de expresión de su libertad como ciudadanos. Y si encima lo lees en aragonés…

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.