Trobada d’o pacto de l’augua mientres en a puerta se protesta contra entibos y trescoles

Asociacions ecolochistas y vecins d'Artieda y Morillo de Galligo demandan que s'aturen Yesa, Biscarrués u Mularroya

A policia identificando en a concentración

A policia identificando en a concentración

O ministro espanyol de Meyo ambient y agricultura, Arias Canyete, ha pasau hue por Zaragoza ta trobar-se con a comisión de siguimiento d’o Pacto de l’Augua y con as peticions d’as collas parlamentarias fueras de CHA ta continar as obras d’o Pacto y d’os regants ta enamplar l’augua en entibos. Mientres, en as puertas d’as Cortz, colectivos ecolochistas y vecins d’Artieda u Morillo de Galligo se achuntaban ta reclamar l’aturada d’ixas obras en os entibos de Mularroya, Yesa y Biscarrués y demandar que se cumpla a directiva marco europeya.

O ministro espanyol Arias Cañete dentrando en a reunión

O ministro espanyol Arias Cañete dentrando en a reunión

O ministro ha dentrau en o palacio por a via de dezaga, refusando trobar-se con os concentraus, que amás, yeran identificaus por a policia espanyola. Os concentraus, encara asinas, han chilau consignas como “Entibos igual a trescoles” y “Canyete trasvasista”. O president de l’Asociación Río Aragón, Luis Solana, ha esplanicau que lo que yera un alcuerdo que pretendeba deixar contentos a totz “fa más de 20 anyos que no sirve ta cosa”. Tamién o vocero de Coagret, Julián Ezquerra, ha reclamau que s’aturen de raso as obras con impactos ambientals negatius y que “amás, valen 800 millons d’euros” en “obras que afectan a rios sin d’augua como lo Grio en o caso de Mularroya”. Entre as obras criticadas, o recreiximiento de Yesa, a construcción de Mularroya, aturada por os chudgaus u Biscarrués.

Concentración contra os entibos y os trescoles

Concentración contra os entibos y os trescoles

Precisament, l’alcaldesa de Morillo de Galligo, lugar afectau por iste zaguer entibo, ha denunciau que o prochecto encara ye redactau en pesetas y no para cuenta en as alportacions de caudals actuals, amás que suposa crebar o modelo de turismo d’os lugars d’a Galliguera. As asociacions presentes, as ya ditas más Ansar u Ecolochistas en Acción, han criticau tamién que o Plan de Cuenca de l’Ebro, aprebau a zaguera semana no incorpora a Directiva Marco de l’Augua europeya y no rispeta os caudals ambientals ubriendo as puertas bataleras a un posible trescole de l’Ebro, amás d’as afeccions en os entibos prochectaus y sinyaus en o Pacto de l’Augua d’Aragón.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.