Trobada en China a gosaralla fosil d’o primate mas antigo conoixiu

O descubrimiento puede modificar bellas teorías sobre a familia d'os primates

Archicebus_oldest-primate-Un equipo internacional d’investigadors ha anunciau iste miercols en a revista Nature o descubrimiento d’a gosaralla fosil de primate mas antiga conoixida d’o mundo, que representa un chenero dica agora desconoixiu y una especie denominada Archicebus Aquiles (imachen). O fosil, desenterrecau d’un antigo lago en a provincia de Hubei, en o centro de China, amán d’o curso moderno d’o río Yangtze, vivió fa uns 55 millons d’anyos en l’Eoceno, quan o mundo teneba un clima mas calido, y yera encara menor que no o primate mas chicot de hue, o lemur zorz enano.

Amás d’estar l’eixemplo mas antigo conoixiu d’una gosaralla de primate temprano, o nuevo fosil ye crucial ta iluminar un escayecimiento clau en a evolución d’os primates y os humanos, a diverchencia evolutiva entre o linache que leva a modernos monos, simios y sers humanos (conoixius colectivament como antropoides), por un costau, y, de l’atro, leva a os tarsers en vida.

L’equipo internacional de scientificos que estudió a gosaralla d’Archicebus estió dirichiu por o doctor Xijun Ni, de l’Instituto de Paleontolochía de Vertebraus y Paleoantropolochía (IVPP) de l’Academia China de Sciencias en Pequín.

Archicebus marca a primera vegada que tenemos un quadro razonablement completo d’un primate cercano a la diverchencia entre tarsers y antropoides. Representa un gran trango ta debant en os nuestros esfuerzos ta trazar o curso d’as primeras fases d’o primate y a evolución humana”, explica Ni.

A gosaralla d’Archicebus ye uns 7 millons d’anyos mas antiga que no as gosarallas de primates fosils mas antigas conoixidas anteriorment, que incluyen o Darwinius de Messel, en Alemanya y o Notharctus d’a Cuenca Bridger, en Wyoming (Estaus Unius).

Archicebus perteneixe a una rama de tot deseparada de l’arbol evolutivo d’o primate que se troba muito mas amán d’o linache que conduce a monos modernos, os simios y os sers humanos, mientres que Darwinius y Notharctus son primates adapiformes que son familiars tempranos d’os actuals lemurs, a rama mas distant en l’arbol d’a familia d’os primates por o que fa a os sers humanos y atros antropoides.

“Archicebus difiere radicalment de qualsiquier atro primate, vivo u fosil, conoixiu por a sciencia. S’asemella a un extranyo hibrido con os pietz d’un chicot mono, os brazos, as garras y os dients d’un primate muit primitivo y un crapacín primitivo que trahie sorprendentment chicotz uellos. Nos obligará a reescribir a evolución d’o linache d’antropoides”, sinyala Christopher Beard, d’o Museu Carnegie d’Historia Natural en Pittsburgh, y un d’os investigadors d’o fosil.

Os analises estadisticos sinyalan que Archicebus yera licherament mas chicot que no os primates vivos mas chicotz, os pigmeus lemurs de Madagascar, con un peso estimau d’uns 20-30 gramos.

Atro d’os autors de l’estudeo, Daniel Gebo, d’a Northern Illinois University, en os Estaus Unius, y experto en a evolución de l’anatomía d’o cuerpo en os primates, recalca que a “chicot mida y a posición evolutiva muit basal d’Archicebus emparan a ideya de que os primers primates, asinas como o debantpasau común de tarsers y antropoides, yera minusclo”.

“Isto trestuca as ideyas anteriors que suchieren que os primers miembros d’o linache antropoides yeran prou grans, d’a mida d’os monos modernos”, adhibe. A isto, Marian Dagosto, d’a Universidat Northwestern en Chicago (Estaus Unius), adhibe: “Tot y que Archicebus pareixe estar un miembro muit basal d’o linache tarsier, s’asemella a os primers antropoides en bellas caracteristicas, incluindo-ie os suyos uellos chicotz y os pietz simiescos. Isto suchiere que l’ancestro común de tarsers y antropoides be d’estar estar en cierta traza mas similar d’o que a mayoría d’os scientificos han pensau“.

As relacions evolutivas entre os primates y os suyos potencials familiars y entre os prencipals linaches dentro d’a orden d’os primates s’ha debatiu intensament entre muitos anyos. “Ta prebar istas diferents hipotesis y determinar a posición filochenetica d’o nuevo primate, se desembolicó una matriz de datos masiva que incluye mas de 1.000 caracters anatomicos y marcas de 157 mamiferos”, dició o doctor Jin Meng, d’o Museu Americano d’Historia Natural en Nueva York, Estaus Unius.

O nuevo fosil recibe o nombre d’o termin griego arkhé, que significa prencipio, escomencipio u “o primer” (o Chenesi en griego empecipia “Arjó” -“En o prencipio”-, a mesma parola que se leye en o labaro u crismón), y d’o griego kebos, que significa “mono de coda larga”. O nombre d’a especie, Aquiles, deriva d’o mitico guerrero tracio d’a guerra de Troya, en destacar a inusual anatomía d’o clavillar d’o nuevo fosil.

O fosil estió recuperau d’os estratos de penyas sedimentarias depositadas en un antigo lago de fa uns 55 millons d’anyos, entre a primer parte de l’Eoceno, un intervalo de condicions globals d’efecto hibernadero, quan gran parte d’o mundo yera cubierta de selvas tropicals y as palmeras creixeban tant t’o norte como en Alaska.

Fuent: http://noticies.sirius.cat/2013/06/trobat-la-xina-lesquelet-fossil-del.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.