Trobadas en Zaragoza dunas con mas de 50.000 anyos

Investigadors d'a Universidat de Zaragoza, en colaboración con scientificos d'a Universidat Complutense de Madrit, ha descubierto dunas eolicas con mas de 50.000 anyos en l'entorno d'a capital aragonesa

Dunas_Zaragoza_50106Se tracta d’a primer vegada que se describen dunas eolicas pleistocenas en a cuenca de l’Ebro y se detalla a suya relación con os depositos fluvials, ha informau a institución academica zaragozana en un comunicau. As conclusions d’o treballo han estau publicadas recientment en a prestichiosa revista “Sedimentology“, que o suyo endiz d’impacto ye entre os mas altos d’ista especialidat d’a Cheolochía.

L’estudeo ha estau realizau por os grupos d’Analís de Cuencas Sedimentarias Continentals y Geotransfer d’o departamento de Sciencias d’a Tierra d’a Universidat de Zaragoza, de conchunta con investigadors d’o grupo d’Analís de Cuencas, d’a Complutense.

Zaragoza: campos de dunas

Os investigadors han contrimostrau que fa mas de 50.000 anyos, entre o Pleistoceno, o paisache d’a cuenca de l’Ebro arredol d’a ciudat de Zaragoza yera muit diferent a l’actual, con importants extensions de terreno cubiertas por campos de dunas d’arena de dica mas de 10 metros d’altaria. Istos campos de dunas se desembolicaban sobre mantos de gravas depositaus en cursos fluvials procedents d’a Cordillera Iberica y Pirineus, os precursors de l’actual río Ebro.

L’eixemplo d’o paisache sería, seguntes as mesmas fuents, parellano a o que s’alufra hue en a parte sud d’Islandia, con dunas arenosas orichinadas en un ambient de disierto muit fredo y retz de canals fluvials con auguas procedents d’os deschelos.

A val de l’Ebro

Os estudeos cheomorfolochicos y sedimentolochicos realizaus en afloramientos de pedreras excavadas en antigas terrazas d’o río han permitiu localizar antigas dunas eolicas en a rechión d’a val de l’Ebro comprendida entre as localidatz zaragozanas de Pedrola, t’o norueste, y Fuents d’Ebro, t’o sudeste.

Istos s’han desembolicau de traza recurrent en relación con as fases aridas y fredas que han existiu mientres o Pleistoceno, una epoca caracterizada por glaciacions y en a que as zonas con chelo permanent alcanzoron en bells momentos o sud d’Europa.

As condicions d’aire en a cuenca de l’Ebro, similars u mesmo con rachas mas fuertes que en l’actualidat, construyoron istas grans formas arenosas que migraban dende o ueste enta l’este, coincidindo practicament con a dirección d’o cierzo actual. Seguntes as mesmas fuents, as dunas eolicas son depositos facilment erosionables y con poca capacidat de preservación por o que se requieren condicions especials t’a suya conservación.

D’ista traza entre etapas con mas plegada d’auguas t’o sector central d’a cuenca de l’Ebro (probablement ligadas a o deschelo de glaciars de montanya) os campos de dunas serían arrasaus conservando-se en cambeo os depositos fluvials (gravas) mas resistents debant d’a erosión.

Dunas protechidas

As peculiars caracteristicas de l’entorno de Zaragoza, con una important disolución de materials salinos, provocoron o fundimiento d’o terreno en grans arias con dunas, de traza que istas se situoron por debaixo d’a superficie d’erosión, quedando protechidas y conservadas. Un feito que evidencia, amás, que en aquell momento existiban en o sector central d’a cuenca de l’Ebro importants extensions de terreno afectadas por dolinas.

L’estudeo detallau sobre os sedimentos d’as antigas terrazas d’a val de l’Ebro son alazetals ta identificar con precisión a edat y caracteristicas d’os periodos climaticos glaciars y interglaciars que s’alternoron en o Pleistoceno entre mas de dos millons d’anyos. Dica que con o prencipie de l’Holoceno, fa uns 10.000 anyos, se dentra en a fase climatica interglaciar actual de caracter mas calido.

Fuent: http://www.aragon2.net/n-20548-702-Halladas_Zaragoza_dunas_50000_anos

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.