Troban en María de Uerva o calavre d’a mesacha desapareixida o cabo de semana

Tot pareixe indicar que estió asesinada por Juan Manuel G. B., qui se suicidó dimpués en Valdespartera o sabado pasau

S’ha trobau iste lunes o que tot apunta a estar o calavre de Natalia A. L., de 29 anyos, desapareixida fa pocos diyas. A Policía Nacional espanyola con aduya d’a Guardia Civil, la ha trobada en María de Uerva, en una barranquera amagada baixo a follarasca, amán d’o km. 18 d’a N-330. A muller pareixeba tener signos d’haber estau estrangulada.

Presuntament, ha estau asesinada por Juan Manuel G. B., de 28 anyos, un exmilitar que o sabado se suicidó fotendo-se un tiro con una escopeta de caza en un escampau en Valdespartera. O suicida deixó una nota en a que apuntaba que heba muerto a una chovena y que heba amagau o calavre en un punto entre Muel y María de Uerva. A policía investigó sobre a posibilidat de que podese estar una mesacha de l’entorno d’o choven y dio con Natalia, que heba desapareixiu y con a que pareixe que heba manteniu bella relación sentimental por un curto espacio de tiempo.

A policía scientifica mantiene ubierta a investigación y busca mas prebas ta aclarir os feitos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.