Troban microbios de 3.000 anyos en un lago de l’Antarctida

Scientificos estadounidenses troban en l'Antarctida bacterias de 3.000 anyos d'antigüedat en un d'os mas duros ecosistemas d'a planeta

Micrografía de bacterias en o lago Vida. Foto: Christian H. Fritsen

A quasi 20 metros (65 pietz) baixo a superficie de chelo d’un remoto lago antarctico, os scientificos d’a NASA, l’Instituto d’Investigacions d’o Disierto (DRI), en Reno, Nevada, d’a Universidat d’Illinois, en Chicago, y atras nueu institucions, descubrioron una comunidat de bacterias en un d’os habitats mas foscos, salaus y fredos d’a Tierra, en l’Antarctida. O descubrimiento podría tener implicacions respective a la posibilidat de que i haiga vida en atras planetas.

O lago Vida, o mas gran de quantos lagos excepcionals que se troboron en as vals McMurdo Dry, no contiene oxicheno, ye quasi de tot chelau y tien os rans mas elevaus d’oxido nitroso de qualsiquier masa d’augua natural d’a Tierra. Un liquido salobre, que ye aproximadament seis vegadas mas salau que no l’augua de mar, se filtra a traviés de l’ambient de chelo, a on a temperatura mediana ye -22 graus Celsius (-8 graus Fahrenheit). L’equipo internacional de scientificos publicó os suyos descubrimientos en Internet o 26 de noviembre, en a primer edición d’os Procedimientos de l’Academia Nacional de Sciencias.

“Iste estudeo proporciona una finestra enta un d’os ecosistemas mas unicos d’a Tierra”, dició Alison Murray, una investigadora d’os polos y ecolochista, adedicada a la microbiolochía molecular, en o DRI. Murray tamién ye l’autora prencipal de l’informe. “Dica agora, poco hemos sabiu d’os procesos cheoquimicos y microbianos en os ambients chelaus, sin luz, especialment a temperaturas baixo zero. Iste treballo ixampla o nuestro conoiximiento d’os tipos de vida que pueden sobrevivir en istos crioecosistemas isolaus y de cómo se pueden fer servir diferents estratechias ta poder existir en istos ambients tant desafiants”.

A tamás d’a naturaleza tant freda, fosca y isolada de l’habitat, l’informe describe que l’augua salada acubilla una variedat sorprendentment diversa y abundant de bacterias que sobreviven sin una fuent d’enerchía actual d’o Sol. Estudios previos d’o lago Vida, que datan de l’anyo 1996, indican que l’augua salada y os suyos habitants han estau isolaus d’as influencias externas mientres mas de 3.000 anyos.

“Iste sistema ye probablement o millor analogo que tenemos de posibles ecosistemas en as auguas subsuperficials d’a luna de Saturno, Enceladus, y d’a luna de Chupiter, Europa”, sinyaló Chris McKay, un scientifico d’alto ran y coautor de l’informe, en o Centro d’Investigacions Ames (Ames Research Center, en idioma anglés), d’a NASA, en Moffett Field, California.

Murray y os coautors y colaboradors en o treballo, incluyindo-ie a Peter Doran que ye o prencipal investigador d’o prochecto, en a Universidat d’Illinois, Chicago, desembolicoron estrictos protocolos y equipos especializaus t’as suyas campanyas de campo, que ocurrioron entre os anyos 2005 y 2010, y que estioron destinadas a prener muestras de l’augua salada d’o lago y tamién evitar contaminar o limpio ecosistema.

“L’ecosistema microbiano que estió descubierto en o lago Vida ixampla o nuestro conoiximiento d’as mugas ambientals t’a vida y aduya a definir nuevos nichos d’habitabilidat”, dició Adrián Ponce, un d’os coautors, d’o Laboratorio de Propulsión a Reacción (Jet Propulsion Laboratory u JPL), d’a NASA, en Pasadena, California, que enumeró poblacions viables d’esporas bacterianas d’o lago Vida.

http://ciencia.nasa.gov/ciencias-especiales/30nov_lakevida/

Fuent: http://noticies.sirius.cat/2012/12/troben-microbis-de-3000-anys-en-un-llac.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.