Troban os papiros mas antigos dica agora, d’a epoca de Keops

Papiros d'a epoca d'o faraón Keops s'han trobau en Echipto, a on se refleixa l'estilo de vida d'os echipcios d'a epoca

papiroUn equipo d’arqueologos ha descubierto en Echipto un puerto historico en a costa d’o mar Royo con os papiros mas antigos trobaus dica agora (foto), ha informau en un comunicau o Ministerio d’Estau por as Antigüedatz. O puerto, que se remonta a la epoca d’o faraón Keops (Kufu/Jufu) -o d’a mayor piramide de Giza y segundo rei d’a IV dinastía que reinó fa uns 4.750 anyos-, se sitúa en a zona d’o Wadi (río) en o Gurf a 180 kilometros t’o sud d’a ciudat de Suez, ta l’este d’Echipto.

En ell, s’han trobau 40 papiros con inscripcions hieroglificas, que documentan a vida cutiana d’os echipcios, beluns d’os quals trahien calendata de l’anyo 27 d’o reinau de Keops.

En a nota, o ministro d’Estau echipcio por as Antigüedatz, Mohamed Ibrahim, explicó que istos textos incluyen rechistros mensuals con o numero de treballadors en o puerto y ofreixen detalls sobre as suyas vidas.

A vida d’os echipcios fa 4.700 anyos

L’arqueologo francés Pierre Tallet, director de l’equipo galo que ha colaborau con arqueologos echipcios en as excavacions, ha adhibiu que en os papiros se refleixa l’estilo de vida d’os ciudadanos en l’antigüedat, os suyos dreitos y obligacions. Os documentos han estau tresladaus t’o Museu de Suez ta que sían estudiaus.

O puerto, t’o qual i plegaban barcos con bronze y metals procedents d’a peninsula d’o Sinaí u de Chipre, tien un muelle, a on s’han descubierto bellas anclas de piedra.

Asinas mesmo, i hai repuis de cambras a on s’aloixaban os treballadors d’o puerto y 30 espelungas excavadas en a roca, chunto a bloques de piedra emplegaus ta zarrar con o nombre de Keops escrito en tinta roya. Tamién s’han trobau cuerdas d’embarcacions y ferramientas emplegadas ta tallar-las.

Keops

Jufu u Kufu (ḫwfw en echipcio antigo), Jéops (Χέοψ en griego), mas conoixiu como Keops, estió o segundo faraón d’a quartena dinastía, perteneixendo a l’Imperio Antigo d’Echipto. Reinó entre 2589-2566 a. C.

En a Lista Reyal d’Abidos y en a Lista Reyal de Saqqara se le denomina Jufu. Estió denominau Jeops (Χέοψ) por Heródoto, y Sufis (Σοῦφις) por Manetón, Julio Africano, Eusebi de Cesarea y Jorge Sincelo. S’han trobau cartuchos dibuixaus en a Gran Piramide de Giza con o suyo nombre Jufu y o que podese estar o suyo epiteto: Jnum-Jufu, «o dios Jnum (u Knum, con cabeza de mardano) me proteche».

O Canon de Turín le asigna 23 anyos de reinau, encara que o suyo nombre ye ilechible. Heródoto comentó que gubernó 50 anyos. Ta Manetón, Sufis reinó 63 anyos, seguntes l’epitome de Julio Africano y a versión de Jorge Sincelo.

Fuent: http://noticies.sirius.cat/2013/04/troben-els-papirs-mes-antics-fins-la.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.