Troban repuis d’o meteorito d’os Urals y confirman l’orichen extraterrestre

O impacto d'o meteorito causó un l'equivalent a un chicot tierratremo en a redolada

O meteorito cayendo (Foto: Alex Alishevskikh)

O meteorito cayendo (Foto: Alex Alishevskikh)

Un equipo de scientificos rusos han trobau trozos d’o meteorito cayiu o viernes pasau sobre a ciudat de Txeliabinsk, y dimpués d’un estudio quimico, confirmoron a suya naturaleza estraterrestre, afirmó l’experto en meteoritos d’a Universidat d’os Urals, Víctor Grojovski.

O trobo se produció en o lago Chebar u Kabar Khol a on que cayó un d’os siete trozos en que se desintegró o meteorito dimpués d’esclatar en l’aire. Arredol d’o forau de ueito metros que deixó a cayida en a superficie chelada d’o lago se replegoron trozos d’una sustencia solida y negra, parellana a la roca, d’entre 0,5 – 1 centimetros de diametro.

“Plegamos de rematar l’estudio y confirmamos que as particlas trobadas por a nuestra expedición en a redolada de Chebarkul tienen efectivament naturaleza meteorica“, explicó l’investigador en declaracions a RIA Novosti.

Precisó que se tracta d’un meteorito rocoso u condrita ordinaria. Os 53 trozo trobaus contienen “totz os mineral tipicos” ta un meteorito, como “o fierro metalico , a olivina u os sulfitos” i ha adhibiu Grojosvski..

Seguntes l’experto, os scientificos no consiguioron acceder t’o forau produciu por a cayida d’o cuerpo celeste, que actualment remane acordonau por as fuerzas de seguridat.

“Encara que yeran autorizaus por o Comité de Meteoritos y portaban documentación, no  les deixoron pasar-ie. Replegoron as particlas d’a nieu. Bi heba un cordón policial allá, pero ya ye esclatero que o meteorito ye aintro d’o forau“, recontó.

D’atras man, l’investigador enantó que os scientificos rusos proposarán d’incluyir o meteorito en o rechistro internacional baixo a denominación de “Chebarkul”, que ye o nombre d’a localidat más amanada a lo puesto a on que cayió. Dica agora, a o cuerpo celeste le han dito en a prensa internacional como o “meteorito d’os Urals” u o “bolido de Txeliabinsk”, ciudat rusa que resultó más castigada por a suya cayida.

A “plevia de meteoritos”, como tamién s’ha conoixiu o inusual suceso d’o viernes, afectó más a las provincias vecina de Tiumen, Kurgan y Sverdlovski y redoladas d’o norte de Kazakhstan, encara que a rechión de Txeliabinsk y en particlar a suya capital estioron las que s’han levau a pior parti. A onda expansiva fació esclatar veires en 4,715 edificios a on que viviban un total de 100.000 familias. Os ferius superoron a milenta de personas, 52 d’ells habioron d’estar hespitalizaus. Seguntes estimacions, a esferra economica ocasionada en a provincia plegan dica os 33 millons de dolars.

A cayida d’o meteorito, dende que dentró en l’atmosfera dica la desintegración, duró 32,5 segundos. Seguntes a NASA, o cuerpo celeste yera de 17 metros y bellas 18.000 toneladas y esclató a una altaria de 20 kilometros, liberando una cantidat d’enerchía 30 vegadas superior a lo bombardeyo atomico d’Hiroshima. O tremol provocau por o impacto suyo estió equiparable a un tierratremo de quatre graus.

 

Fuent: http://noticies.sirius.cat/2013/02/troben-restes-del-meteorit-de-urals-i.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.