Troban una planeta que orbita dos estrelas

Se diz Kepler 16b y ye a 200 anyadas luz d'a Tierra.

Una nueva planeta ye trobada en l’universo. A nave Kepler d’a NASA trobó, a más de 200 anyadas luz d’a Tiera una planeta que tien dos sols, lo que se conoix como planeta cirbumbinario. Ye a primer vegada que se troba una planeta con ista caracteristica, encara que  bi ha sospeitas d’atros.

A planeta s’ha clamau Kepler 16b, tien a mitat de masa que Saturno y ye feito mitat de roca y mitat de gas. As dos estrelas que orbitason prou diferents. La una brila a-saber-lo y tien una luz narancha. L’atra ye más chicorrona y muito roya. Seguntes explicó un especialista, ista ye una factor muito important ta saber si a planeta puet estar habitable.

Trobar a Kepler 16b no estió mica facil. Seguntes a revista Science os astronomos paroron cuenta a escape d’a presencia d’as dos estrelas porque s’eclipsaban la una a l’atra periodicament. A gran eclipsaba de tot a la chicota y la chicota bell poquet a la gran. Manimenos o brilo d’o sistema se escureieba de cabo ta quan sin garra razón. Isto les fació pensar en un tercer obcheto que, a la fin, estió a planeta.

As dos estrelas s’orbitan entre ellas cada 41 diyas. A planeta las orbita a las dos cada 229 diyas, parellano a la orbita de Venus arredol d’o nuestro Sol. O nuevo mundo ye parellano a Saturno tanto en grandaria como en masa y a suya temperatura ye, posiblement, prou baixa ya que as dos estrelas son prou chicotas. Istas caracteristicas fan que siga prou dificil que pueda haber-ie vida tal y como la conoixemos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.