Tsipras, primer ministro griego pactando con a dreita euroesceptica

Syriza fa coalición de gubierno con os Griegos Independients. Os neonazis d'Alba Dorada, tercer fuerza

Alexis Tsipras (Foto: Vilaweb)

Alexis Tsipras (Foto: Vilaweb)

Alexis Tsipras ya ha preso posesión como nuevo primer ministro de Grecia, a l’atro diya d’a victoria de Syriza, a gran ganadora d’as eleccions griegas. Ista asunción d’o cargo tant rapeda ye estada posible gracias a l’alcuerdo con a dreita radical euroesceptica d’os Griegos Independients. Tsipras ha prometiu o cargo debant d’o president griego, Karolos Papoulias, estando a primer vegada que un primer ministro griego no chura lo cargo en una ceremonia relichiosa sino civil.

A coalición de gubierno entre Syriza y os Griegos Independients tienen o control de 162 d’os 300 diputaus d’o parlamento.

Tsipras ninvia asinas un mensache contundent a Bruselas d’oposición a los dictaus d’a troika. A coalición de gubierno de Syriza con a dreita euroesceptica ha deixau descolocada a buena parte d’os aliaus europeus d’a formación referent d’a cucha anti-troika.

Syriza ye a clara ganadora d’as eleccions griegas pero s’ha quedau a nomás dos escanyos d’a mayoría absoluta. A mayoría absoluta ye de 151 diputaus y o partiu d’Alexis Tsipras 149, un resultau en tot caso extraordinaria. A conservadera Nueva Democracia d’o primer ministro en funcions, Andonis Samaras ha conseguiu 76 diputaus – cal recordar que a primer fuerza electoral recibe 50 diputaus de bonificación. A extrema dreita Alba Dorada se confirma en tercer posición, quasi empatada con o centrista-liberal To Potami. Os socialistas d’o PASOK han caito más de siet puntos y han rematau seisenos, con nomás o 5% d’os votos, por dezaga d’os comunistas d’o KKE.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.