Turquía, o movimiento popular s’amplifica

Partindo d’una simpla oposicion a un prochecto immobiliario en o corazón d’Istambul, a protesta d'o pueblo turco ye dirichida contra a politica d'o partiu en o poder y mas que mas contra a islamizacion y as midas autoritarias

revuelta turquía

Foto: Occupy Wall St.

Os numerosos actors d’iste movimiento yeran vestius de negro, o lunes, ta amostrar o suyo descontento y demandoron a la chent d’os países extranchers d’apostar por ells. Bellas manifestacions s’organizoron mientres toda a chornada en Istambul, Ankara y tamién dentro d’atras ciudatz d’o país.

En Ankara, mils de chovens, estudiants en una gran parte, se menoron t’o centro d’a ciudat dentro d’o vico de Kizilay y estioron blanco d’o gas glarimocheno d’a policía. As organizacions humanitarias presents charran de centenars de nafraus dimpués d’o prencipio d’o movimiento pero ye embolicau de tener-ne un balance prou preciso. Una cosa segura, ye que dos hombres han muerto dimpués d’o prencipio d’os enfrontinamientos: un n’ha estau trasladau por un taxi ta Istambul, l’otri ha recibiu una bala en a frent en Ankara. Tamién seguntes testigos, partidarios de l’AKP enristioron con cutiellos a manifestants oposaus a os islamistas.

Prueba de que a situación no se calma, ye que a Confederación de Sindicatos de Treballadors d’a Función Publica (KESK) ha lanzau hue y maitín un clamamiento a la vaga contra a represión policial. Turquía no ha conoixiu tal movimiento de contestacion dimpués d’a plegada en o poder de l’AKP. Cal sinyalar a unión inedita entre nacionalistas de dreita y militants de cucha, dos partes que han estau profundament ligadas a la laicidat historica de Turquía. Ista laicidat ha estau mesa en dubda en istos zaguers anyos por un retorno a o primer plano d’a relichión dentro de l’espacio publico.

Tamién se pasa por problemas grieus de libertatz y de dreito d’expresión. As recients leis adoptadas por o parlamento turco esfienden viedar beber alcol en publico u fer-se besos en publico. L’afer d’o parque de Gezi estió, pareixe, masiau. Dimpués d’o viernes pasau, os manifestants no deixan de denunciar a posición d’os medios turcos que son acusaus de no retransmitir os sucesos y de seguir as ordens d’o gubierno. Como isto, s’han apoderau d’os retz socials que chugan agora un rol important dentro d’iste movimiento popular. Cada menuto son mas de 3000 tuitz que son postiaus por os diferents actors d’ista protesta. O lunes pasau, o gubierno turco calificó alavez a Twitter d’a “menaza mas important que n’i hai t’a sociedat”.

O primier ministro Erdoğan, que concentra todas as exasperacions d’os turcos, no pareixe preocupau por iste malcontento que creixe. Ye agora de viache en o Magreb y debería tornar o chueves ta Turquía. Considera a chent que ye en as carreras que son “marguinaus y extremistas“. Denegando de raso a realidat d’a crisi, aspera fer baixar a contestacion sin comprometer-se con garra negociación ni concesión.

Fuent: http://www.jornalet.com/nova/1900/turquia-lo-moviment-popular-samplifica

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.