Twitter y un reloch de 20.000 euros

Daniel Torres Burriel

Ha tornau a pasar. Una vegada mas, y ya son a-saber-as as que ha succediu, Twitter s’ha convertiu en a plaza d’o lugar an que a chent ha comentau o que a clase politica ha feito y a prensa mos ha amostrau.

Ahiere sabiemos a traviés d’El Periódico d’Aragón que as Cortz d’Aragón han gastau 20.000 euros en un reloch ta que as suyas senyorias tiengan controlau o tiempo d’as suyas intervencions. En o contexto actual de crisi economica y as aireras de retalladas que corren por o país, no faltó qui empecipió a comentar en Twitter que a noticia quan que menos resultaba impactant.

En pocos menutos os RT, as mencions y as chanadas sobre l’afer pobloron buena parti d’os timelines d’os usuarios. En menos d’una hora se creyoron dos hashtags que alcompanyaban os tuitz d’a chent: #motosierraAlReloj y #unrelojparaBiel. Iste zaguer veniba alcompanyau d’una propuesta, inchenyosa y divertida, consistent en ninviar relochs viellos ta las Cortz a o ficacio d’o President d’a institución.

En tot caso a indignación yera la nota dominant de totz os comentarios d’as presonas que, de forma espontania, participoron d’ista conversa. Y tot ixo, no se mos ixuplide, succedeba en o mesmo inte en que a canal oficial d’as Cortz retransmitiba vía Twitter a sesión parlamentaria. Estió tot un eixemplo de dos realidatz que succeden a o mesmo tiempo, espalda con espalda: a clase politica por una parte y os ciudadans por unatra.

Malament ferían os politicos en seguir mirando enta unatro costau quan succeden istas cosetas. As tecnolochías basadas en o realtime no son l’esdevenidero. Son o present. Y han veniu ta #quedar-se’n.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.