Ubierto lo plazo d’inscripción t’o Roscón Rock

A mosica feita en Aragón sale t'as carreras zaragozanas o venient 29 de chinero

cartel

Dende o pasau 6 de chinero ya ye ubierto lo plazo d’inscripción t’as collas y mosicos que quieran participar en a IX edición d’o Roscón Rock, o festival reivindicativo de mosica que se celebra en Zaragoza, coincidindo con a fiesta local de Sant Valer.

O Roscón Rock imple as carreras y plazas d’o centro zaragozano con mosicas de toda mena d’as producidas en o país. As plazas Sas, Arinyo, Sant Pedro Nolasco, José Sinués, y Sant Felipe, serán os scenarios en o maitin d’o 29, dende as 11:30. O Paseu Independencia prenerá o relevo t’a tardi, a partir d’as 18:00.

Como todas as anyadas, l’evento viene pleno de reivindicacions. Dende a suya organización siempre s’ha insistiu con que ye un festival “organizau por mosicos aragones, por dengún más“. Pero antimás concretan bells obchetivos: como a creyación d’una oficina d’asesoriamiento ta mosicos, emplego de baldes d’os centros civicos t’actividatz culturals, milloras en os horarios d’os locals d’ensayo, permisos especials ta que os menors d’edat puedan dentrar en os conciertos y muitos atros, totz arredol d’o mundo d’a mosica.

Tamién remeran como belunas d’as reivindicacions que teneban en edicions anteriors s’han conseguiu totalment u parcial, como a iniciativa “1+1 en fiesta patronals“, que demandaba que por cada colla forana actuase tamién una atra aragonesa ta mirar de potenciar a mosica d’o país. Ista iniciativa, dicen os organizadors, se iu fendo alto u baixo en as tres grans ciudatz y, más que más, en Teruel. As reivindicacions completas se pueden leyer en o formulario que han penchau en a web d’o Roscón Rock.

Os mosicos que quieran apuntar-se-ie nomás les cal dentrar en a pachina web de l’evento, emplir un formulario y inviar-lo ta rosconrock@gmail.com. O 22 de chiner se ferá una rueda de prensa ta presentar o RoscónRock d’ista anyada y a on que se ferán conoixer as collas y mosicos que protagonizarán a chornada.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.