Ubierto o plazo de recepción t’o concurso de relatos sobre a Bolsa de Bielsa

Os relatos podrán estar escritos en aragonés y castellano y podrán inviar-se por correu electronico

A 43 División Republicana. Foto: Museu d'a Bolsa de Bielsa

A 43 División Republicana. Foto: Museu d’a Bolsa de Bielsa

L’Asociación Sobrarbenca “La Bolsa” convoca o concurso de relatos sobre a Bolsa de Bielsa. Por cinqueno anyo consecutivo lanzan ista propuesta literaria “que nos aporta gran ilusión por os treballos presentaus y por o sentimiento que muitos d’os relatos desvelan d’a nuestra historia mas recient” sinyalan dende l’asociación.

Os treballos se pueden presentar en aragonés y castellano. “Iste anyo damos a posibilidat d’invío por medio d’e-mail, reducindo asinas gastos t’as y os autors y privando consumos de papel, tinta y invío”, explican.

A calendata maxima de recepción de treballos ye o 12 de mayo de 2014, ta vagar a la suya evaluación por o churau. Os premios d’o concurso literario se darán en as VIII Chornadas d’a Bolsa de Bielsa que se celebrarán os días 13, 14 y 15 de chunio de 2014 en o Sobrarbe. “O programa s’empecipia a perfilar dende iste mesmo momento”, adhiben. As bases d’o concurso se pueden consultar en iste enlaz.

Dende l’asociación “animamos y tendemos a man a qualsiquier iniciativa t’a realización d’unas chornadas que anyo sin atro nos fan compartir, debatir y informar d’os tristes escayecimientos d’a Bolsa”.

Como nota agradable d’o concurso l’asociación recuerda que l’anyo pasau ganó un relato de Yomel Luis Estrada, natural de Durango (Mexico), alumno d’un exiliau republicano en o pais latinoamericano. “Con ista anecdota dicimos que o nuestro concurso ya ye internacional”, concluyen.

A Bolsa de Bielsa estió o zaguer d’os episodios belicos d’a guerra civil entre os sublevaus y l’exercito d’a Republica en o frent d’Aragón. Simbolizando a tenaz resistencia d’a “43″ División Republicana. L’exodo de población civil, unas 5.000 personas, ent’o Estau francés, estió un eixemplo d’organización y solidaridat de l’exercito republicano con o pueblo aragonés.

Fuent: http://arainfo.org/2014/01/abierto-el-plazo-de-recepcion-para-el-concurso-de-relatos-sobre-la-bolsa-de-bielsa/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.