Ultimatum a Grecia ta que pida un ixample d’o rescate

osO ministro griego de Finanzas confita en alcanzar un alcuerdo “en dos diyas” y achuga por un “nuevo contracto" que sía "bueno ta totz dos”

Yanis Varoufakis. Foto: Jfgoulon (CC-BY-SA 4.0)

Yanis Varoufakis. Foto: Jfgoulon (CC-BY-SA 4.0)

A que pareixeba iba a estar una reunión interminable, a de l’Eurogrupo d’iste luns, finalment ha estau un fracaso total que mete a la eurozona y a os suyos 19 países miembros en o limite, con a divisa comunitaria pendendo sobre un fino arambre. A la fin d’a breu reunión, o president de l’Eurogrupo, l’holandés Jeroen Dijsselbloem, s’ha declarau en rueda de prensa “muit decepcionau” y ha dau dica o viernes un ultimatum a o Gubierno de Grecia ta que accepte l’ixample d’o rescate, o programa de 130.000 millons d’euros lanzau en 2012 a truca de reformas. Atenas tien quatro diyas, dica o viernes, ta decidir.

“Ye claro que o proximo paso ha de venir d’as autoridatz griegas”, ha sinyalau Dijsselbloem. “En vista d’o calandario, podemos estar charrando d’ista semana, pero no tenemos mas tiempo”, ha adhibiu o neerlandés, confirmando que o limite d’a paciencia de l’Eurogrupo finaliza o viernes. En realidat, o plan de rescate a Grecia concluye mas tarde, o 28 de febrero.

O ministro de finanzas heleno, Yanis Varoufakis, ha amostrau confitanza en que se pueda aconseguir un alcuerdo “en dos diyas” y ha achugau por un “nuevo contracto entre Grecia y l’euro que sía bueno ta totz dos”. Europa, ha dito, en rueda de prensa dimpués d’a trobada, ye “indivisible”, “chugar” con a ideya de ruptura ye “antieuropeísta” y “en a historia d’a UE cosa buena ha surtiu d’os ultimatums”.

D’alcuerdo con portavoces d’a delegación griega citaus por Le Monde, a Comisión Europea, bregada os zaguers diyas en quitar ta debant como sía un alcuerdo, habría proposau a Atenas un “texto acceptable”. Manimenos, siempre seguntes ixas fuents, “ha estau Dijsselbloem o que de rapiconté ha proposau una serie de condicions extra a o documento d’a Comisión que hemos considerau inacceptables”.

A delegación de Grecia que acompanyaba a Varoufakis ha quiesto destacar o treballo d’o comisario d’Afers Economicos, o francés Pierre Moscovici. T’o ministro de Finanzas d’Alexis Tsipras, expierto en a denominada “teoría de chuegos” –que bebe muito de negociacions a o limite como a que ye tenendo puesto istes diyas en Bruselas–, ye indispensable un plan de transición u “programa-puent” que permita de prolargar as vías de financiación griegas entre uns meses y posibilite a negociación d’un “nuevo contracto” entre Atenas y os suyos acreyedors prencipals, que son os 18 países con os quals comparte moneda.

En iste periodo, a ideya de Syriza, partiu izquierdista vencedor d’as lechislativas griegas, sería aplicar belunas d’as midas antiausteridat prometidas entre a campanya electoral, como l’aduya humanitaria a las napas mas empobrecidas d’a población, a reforma tributaria progresiva u a final d’as privatizacions.

A ruptura d’iste luns marca un fito en l’Eurogrupo: ye a primer vegada que un país trenca o consenso comunitario dende que prencipió a crisi (2008) y os conclaus europeus empecipioron a succeder a velocidat de vertigo, dende encomienzos de 2010. A parola de moda en a capital belga istes diyas ye clash (choque).

Se tracta d’un enfrontinamiento anunciau: “Somos decidius a entrar en conflicto con os intreses d’os poderosos con a finalidat de permitir desapegar a Grecia y ganar a confitanza d’os nuestros socios”, escribiba Varoufakis a vispra de l’Eurogrupo en The New York Times. “Tamién somos decidius a no estar tractaus como una colonia por culpa d’a deuda…”.  A respuesta plegó por boca d’o suyo homologo alemán, Wolfgang Schäuble, tamién menutos antes d’a trobada, en qualificar de “irresponsablel’actitut de l’Executivo griego. A financiación de Grecia y a suya permanencia en l’euro son dende iste 16 de febrero dos obchectivos muit complicaus en ista Europa chermanizada.

Fuent: http://www.eldiario.es/economia/Alemania-Eurogrupo-ultimatum-Grecia-extension_0_357315240.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.