Un anyo d’ista aventureta que se diz Arredol

Arredol fa un anyo y tos queremos agradeixer totz o que hetz feito por nusatros

Hue fa un anyo que decibamos a o mundo que naixeba Arredol, l’aventura de comunicación ta fer un diario dichital de raso en aragonés. Naixebamos chusto quan feba un anyo que Labordeta heba muerto, y con a lei de luengas sin desembolicar, agora que ya la han matau de tot. En istos 365 diyas han pasau un camatón de cosas que malas que bien hemos contau en iste chicot diario. Continamos en a mesma delera: “Pretendemos aconseguir un meyo estable y sosteniu en o tiempo que premita a la sociedat aragonesa contar con unatra posibilidat mas de informar-se y participar en a creyación d’a información. No somos un gran meyo de comunicación y no plegaremos a tot, encara que contamos con a vuestra aduya y o vuestro refirme. Pero si que tenemos a ideya de creyar contenius en aragonés que premitan normalizar l’emplego d’ista luenga minorizata en dembas poco exploradas dica agora”.

Contamos con os nuestros uellos y as nuestras mans, pero tamién con os vuestros. Mos hetz feito plegar noticias de tot o país y tamién de difuera, mos hetz feito plegar convocatorias, notas de prensa (muitas d’as quals no adubimos a publicar), fotos, comentarios, videos y sobre tot, o vuestro carinyo y refirme ta ista aventureta que naixeba baixo a protección d’a bienvenida que mos feban chents como Quim Monzó, Dani Torres Burriel, Antón Castro u Eduardo Lolumo. Y asinas continaremos. Con prochectos que mos redolan o tozuelo y que de vegadas no hemos puesto fer. Con prochectos que si que veyeretz con o tiempo, y con a ideya firme de continar, china chana, fendo d’iste espacio un espacio ta la comunicación en aragonés, an que poder informar-se de muitas d’as cosas que pasan a nuestro arredol.

Ta fer ixo, tos amenistamos. Mos feria goyo que continasetz leyendonos, comentandonos, fendonos plegar as vuestras noticias, y sobre tot, creyendo que vivir en ista chicorrona luenga encara ye posible en iste país nuestro. Muitismas gracias a totz por ser aquí con nusatros. Un millón de gracias a totz y totas. Totz femos que Arredol contine dende hue, ta un, y ta muitos anyos más.

Gracias y gracias.

8 Rispuestas a Un anyo d’ista aventureta que se diz Arredol

  1. Pingback: Felicidades a Arredol | AraInfo | Achencia de Noticias d´Aragón

  2. Que tiengaz una vida fructifera i llarga i que ixa illusion no s’acotole mai ta que juntos, totz i totas, podam sacar enta devant esta tierra que tanto querim. Muitas gracias de tot coraçon.

  3. Goyoso cabo d’anyo Arredol y muitas gracia por a vuestra rasmia y o vuestro treballo. 🙂

  4. Muchas gracias a todos los que haceis posible cada día este sueño llamado Arredol.

  5. Muitismas gracias, y animo ta continar con ista faina en a escuridat, iste treballo fosco, pero que tan important ye.
    Muitos anyos mas…

  6. Muitas gracias per dar-nos totz os diyas l’enchaquia de leyer as noticias en aragonés. Sotz a referencia d’ista luenga minorizata y acotolada, o mirallo a on muitos encara gosamos uellar-nos.

    Que plantetz fuerte! Ent’alto Arredol!

  7. Muitas felicidades por esi primer aniversariu, ya que-l.ly sigan muitos más.

  8. muitas gracias por ufrir-nos a posibilidat de fer-nos más fácil ixe suenio que ye o de vivir n’aragonés.

Responder a cincodecopas Cancelar respuesta

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.