Un choven denuncia en video un batán d’a UAPO por fer-se un fumarro en un concierto

No ye a primer vegada que iste cuerpo d'a policía local de Zaragoza ye acusau d'exceso de fuerza u tien actuacions polemicas.

2 febrero, 2014 | Zaragoza | Autor: Arredol | Tweet

Marrca d’un d’os trucazos recibius por o choven

Un choven zaragozano ha feito publico un video en Youtube a on que denuncia haber recibiu tot un batán de man d’achents d’a UAPO (Unidat de Refirme Operativo). Os feitos pasoron o pasau viernes 24 de chinero dimpués d’o concierto d’a colla aragnesa de reggae Jah’sta, en o Centro mosical Las Armas, en Zaragoza.

O choven, seguntes reconta en o video, estió carranyau por a seguridat d’o centro por fer-se un fumarro aintro d’o local. En concarar-se-le, o miembro d’a seguridat le menazó y marchó, tornando en un rato con achents d’a unidat policial, una mena de antidisturbios, pero que perteneixen a la policía local zaragozana. Os achents le detenioron y, una vegada difuera d’o centro, prencipioron a foter-le un buen batán y a fer-le rebaixadas, seguntes se reconta en o video. O choven amuestra antimás, as marcas d’os trucazos que le fotioron como preba d’o feito.

Rematando lo video, o choven s’endreza t’os policías a qui les pregunta qué pasaría si ixo le pasase a bell conoixiu u parient suyo, a la resta de policías demandando que no consientan ixos comportamientos y a la sociedat ta que los denuncie. Os policías, explica l’afectau, han presentau antimás denuncias contra ell por agresions.

A propia colla de mosica Jah’sta ha denunciau tamién os feitos y l’actuación tanto d’a propia policía como d’a dirección d’a sala de conciertos, qui les clamoron.