Un conflicto interadministrativo mete en periglo as becas de minchador en Zaragoza

O Concello de Zaragoza diz que se'n encargara d'o conflicto d'os minchadors

Colechio de Zaragoza (Foto: Gobierno d'Aragón)

Colechio de Zaragoza (Foto: Gobierno d'Aragón)

Totz os anyos prencipia o curso escolar y con él se meten en marcha totz os servicios complementarios d’a vida escolar: autobous, minchadors escolars, clases extraescolars,… En bels colechios, os treballadors y treballadoras d’os PIEEs (Prochectos d’Integración d’Espacios Escolars), pioneros en l’Estau y especificos en Primaria ta barrios degradaus como Oliver u Casco Historico de Zaragoza, levan varios meses sin cobrar y han anunciau a las comunidatz educativas que no pueden continar prestando lo servicio como lo feban dica agora.

Manimenos, l’asunto se torna prou diferent quan lo que se queda sin funcionar ye o minchador escolar. En o vico Oliver, per exemplo, ista anyada encara no s’ha puesto meter en marcha perque no plegan as becas ta las familias que no pueden fer frent a o suyo coste, que en istos centros plegan cuasi a o 100%.

O Concello de Zaragoza, que dica agora s’encargaba de financiar lo que no podeba o Gubierno d’Aragón, s’ha mostrau contundent con o conflicto d’as becas de minchador dimpués de que Heraldo d’Aragón sinyalase que todas as aduyas yeran en a cuerda floxa. Fernando Gimeno, Vicealcalde d’a ciudat ha asegurau posteriorment que o Concello se’n encargará, encara que “lo que no puede estar ye que [o concello] contine bosando lo que a DChA no li bosa”, y remeró que “a capital aragonesa invierte 19,9 milions d’euros en os 79 colechios publicos ta fer frent a o presonal, conservación d’o centro, limpieza y costes de luz, augua, gas y combustible”, bella cosa que fan totz os municipios d’o país en as suyas escuelas.

Tanimientres, o servicio de comedor encara no s’ha meso en marcha, situación que s’agravará quan prencipie a chornada de tardis en octubre, ya que muitos zagals dixarán d’acudir a la Escuela de tardis si han de tornar ta casa suya ta chentar, atamás de que ta muitos zagals o servicio de minchador constituye una iniciativa educativa más que no recibirán en casa suya, dau que muitos d’ells provienen de familias que no pueden fer frent a las necesidatz d’alimentación ni a las rutinas d’horarios que se treballan en os minchadors escolars.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.