Un convenio entre o gubierno estatal y l’aragonés dará 30 millons d’euros ta Teruel

Meyant iste convenio s'esmienda a error de no incluyir o Fondo d'Inversions ta provincia de Teruel en os Presupuestos Chenerals de l'Estau

Foto: Albarracín. Fuent: Wikipedia

Dimpués d’a error que ha deixau difuera o Fondo d’Inversions de Teruel en os Presupuestos Chenerals de l’Estau, o gubierno espanyol, meyant o Ministerio de Ficienda, ha anunciau a sinya d’un convenio de colaboración anyal entre l’Administración Cheneral de l’Estau y a Diputación Cheneral d’Aragón, que compromete dica 30 millons d’euros.

O gubierno espanyol se “xublidó” d’incluyir a la provincia teruelana en un fondo especial de compensación que recibe dende uns 20 anyos, y Cristóbal Montoro, ministro de Ficienda, ha esmendau l’error con iste convenio, dimpués d’as queixas plegadas dende Aragón. Dende o concello de Teruel, tanto “socialistas” como “populars”, con l’alcalde, Manuel Blasco, presentoron y s’aprebó por unanimidat una moción en a que instoron a o gubierno central a incluyir os 30 millons d’o Fondo d’Inversions de Teruel en os Presupuestos Chenerals de l’Estau. Dende o PSOE, criticoron a error, considerando que o xubliu ha estau intencionau.

O gubierno aragonés financiará iste convenio en un 50%. Os prochectos a financiar con o fondo tendrán una valor minima de 125.000 € cadagún con l’obchectivo de “desembolicar actuacions que favoreixcan a cheneración de renta y riqueza en a provincia de Teruel”. Os prochectos a financiar irán destinaus a actuacions en iniciativas interpresarials industrials, agroalimentarias y turisticas; infraestructuras, prochectos estratechicos t’a provincia, infraestructuras municipals y accions en o patrimonio cultural y ambiental.

Una rispuesta a Un convenio entre o gubierno estatal y l’aragonés dará 30 millons d’euros ta Teruel

  1. La españolización de Teruel y sus consecuencias…

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.