Un diya clau t’o futuro de l’euro

Maxima expectación debant d'a reunión de hue d'o BCE · Os estaus d'o sud d'Europa presionan ta que Alemanya se comprometa

A reunión d’o consello de gubierno d’o Banco Central Europeu, que se fa hue, suscita grans expectativas, pero tamién muita incertidumbre. Se’n aspera una declaración posterior a la reunión que explique como se concretarán as parolas d’o president d’o BCE, Mario Draghi. Iste dició a semana pasada que fería tot o posible ta esfender l’euro.

Entremistanto, o primer ministro italián, Mario Monti, contina a suya ronda de contactos europea ta reunir tot o refirme posible y poder presionar con fuerza ta que s’apliquen os acuerdos d’a zaguera cumbre europea. En ista ronda se reunirá hue con o president d’o gubierno espanyol, Mariano Rajoy.

As parolas que dició Mario Draghi a semana pasada, han feito pensar que o BCE remataría concedendo una licencia bancaria a o fondo de rescate, que permitiría alicherar a presión, mas que mas sobre Espanya y Italia. A licencia permitiría a o fondo de rescate recursos ilimitaus en as subhastas de liquidez d’o BCE.

Pero Alemanya se i oposa de raso y no quiere de garra forma que o BCE merque deuda soberana. Ahiere mesmo o ministro d’Economía alemán, Philip Rösler, encara insistió en a negativa d’o suyo país a la licencia bancaria. Sumariament, reiteró que Alemanya quereba una ‘Unión d’a estabilidat’, alazetada en o pacto fiscal, no una ‘Unión d’a inflación’.

Amás, o president d’o Bundesbank, Jens Weidmann, manifestó ahiere que o Banco Central d’Alemanya teneba ‘una voz mas fuerte’ dentro d’o BCE que no a mayoría de bancos d’os estaus d’a eurozona, y que se sobrestimaba a capacidat d’o BCE.

Mientres Alemanya asedia a Draghi, Mario Monti contina a rueda de contactos ta presionar a Alemanya. Monti, que hue se reunirá con Mariano Rajoy, confita que o fondo de rescate europeu recibirá a licencia bancaria que suministraría oxicheno y capacidat d’actuación. ‘Pasará quan toque’, dició ahiere.

Fuent: http://www.vilaweb.cat/noticia/4032280/20120802/clau-futur-leuro.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.