Un enigmatico asteroide con seis codas

Un enigmatico asteroide apareixe debant d'os astronomos como si estase un cometa

asteroideUn equipo d’astronomos que treballan en a misión Hubble d’a NASA y l’Achencia Espacial Europea (ESA) han observau un obchecto unico y desconcertant en o cincho d’asteroides. O cuerpo se veye como una pluma de badminton rotando y con una enorme coda similar a la d’as estrelas. Os asteroides normals amaneixen como chicotz puntos de luz quan son observaus por os scientificos. Pero iste asteroide, denominau P/2013 P5, en tien seis de codas de cometa de polvo que irradian d’ell como os radios d’una rueda.

Estió visto por primer vegada en agosto d’iste anyo. A traviés d’o telescopio Pan-Starrs de Hawai, como un obchecto con un aspecto extraordinariament difuso. Ista trobada, que ha estau publicada en The Astrophysical Journal Letters, ha causau gran expectación en a comunidat scientifica porque no s’ha visto brenca como isto antes y os astronomos son tractando de trobar una explicación adequada d’a suya misteriosa aparixión.

As imachens d’o Hubble estioron presas o 10 de setiembre de 2013. Quan Hubble tornó ta l’asteroide o 23 de setiembre, o suyo aspecto heba cambiau de raso. Pareixeba que toda a estructura heba oscilau arredol.

“Yeranos literalment sin sangre en a pocha quan lo veyemos”, ha explicau un d’os autors, David Jewitt. “O mas sorpresivo ye que as suyas estructuras posteriors cambean dramaticament en solament 13 días, ya que rota o polvo. Isto tamién nos ha pillau por sorpresa y no ye facil creyer que somos veyendo un asteroide”, ha apuntau.

Posibles explicacions

Una explicación t’a extranya farcha d’iste cuerpo celeste ye que a velocidat de rotación de l’asteroide aumentase dica o punto que a suya superficie empecipiase a volar en trozos, expulsando polvo en erupcions episodicas que habrían empecipiau a pasada primavera.

As teorías d’os astrofisicos refusan que se tracte d’un asteroide dimpués d’un impacto, ya que en iste caso a gran cantidat de polvo s’habría espardiu por o espacio d’una sola vegada, mientres que en iste cuerpo o polvo ha estau expulsau de forma intermitent entre un periodo d’a lo menos cinco meses.

Agora, l’equipo d’o Hubble ye relizando nuevas observacions de seguimiento. Os scientificos asperan determinar si o polvo sale de l’asteroide en o plano equatorial, o que sería una evidencia d’una trencadura de rotación.

Fuent: http://noticies.sirius.cat/2013/11/un-enigmatic-asteroide-amb-sis-cues.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.