Un exdiputau confirma a existencia de sobresueldos en o Partiu Popular

A tronada politica que viven os populars s'acreixenta por momentos y vive un nuevo capitol d'a man de Jorge Trías, que asegura conoixer a existencia d'os sobres de Bárcenas

sedepp

Siede d’o PP en a C/ Génova de Madrit. Foto: Wikipedia

Mariano Rajoy y María Dolores de Cospedal tornarán a salir iste lunes a prener parte ta prebar d’aleixar a tronada d’a corrupción de Génova 13. Dende que a semana pasada El Mundo destapase que Luis Bárcenas pagaba sobresueldos en negro a miembros d’a cupula d’o PP s’han publicau distintas informacions que apuntan a dirichents entre qui se troba a propia secretaria cheneral d’os ‘populars’.

Amás, iste lunes El País, que s’ha sumau a ista investigación, publica o testimonio d’un exdiputau d’o PP que confirma a información d’a semana pasada. Jorge Trías Sagnier asegura que dirichents de Génova se llevaban ta a casa mensualment dica 10.000 euros extra que cobraban en efectivo como sobresueldo a la suya nomina. Seguntes cuenta a o diario El País, tanto Bárcenas como l’atro extresorero, Álvaro Lapuerta “levaban a contabilidat B tanto d’as donacions personificadas como d’as anonimas”.

En o primer testimonio aintro d’o PP con nombre y apellius, iste confirmaría tamién l’escandalo destapau por a investigación chudicial, que apunta a que l’extresorero Bárcenas plegó a amagar 22 millons d’euros en Suiza, d’os que 10 millons salioron d’ixas cuentas coincidindo chusto con a campanya electoral d’o Partiu Popular de l’anyo 2008.

En a entrevista publicada por El País, Trías Sagnier demanda a las cabezas d’o partiu, o president Rajoy y a secretaria cheneral, Dolores de Cospedal, que den un trango entabant y expliquen con detall l’ocurriu en a cupula d’o Partiu Popular. L’exdiputau de Génova 13 exiche que se den explicacions a militants, afiliaus y a la ciudadanalla porque “si no creyemos en qui gubiernan a nación, ¿Cómo podrán estomagar os ciudadanos tantos sacrificios como se les son exichindo?”.

Por a suya parte, Dolores de Cospedal ha insistiu iste cabo de semana en que o PP tornará a repasar as suyas cuentas y contrimostrará que tiene as “mans limpias”. Mientres, Rajoy, se dirichirá a os suyos en a Executiva d’o PP a on abordarán a crisi que ha chapurquiau a o Gubierno colocando-lo en un serio apreto nomás un anyo dimpués d’encetar o suyo mandato.

Fuent: http://www.aragon2.net/n-20500-502-exdiputado_confirma_existencia_sobrsueldos_Partido_Popular

Una rispuesta a Un exdiputau confirma a existencia de sobresueldos en o Partiu Popular

  1. Pingback: Ya no cabe más mierda en las cloacas | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.