Un festival de teatro solidario replegará diners ta Chiapas

cartelUna anyada más, y en van cinco ya, o Caracol Zaragoza, rete de personas por l’Autonomía Zapatista, organiza iste 12 de chinero, o Festival Solidario con Chiapas, a on que prebarán de replegar diners endrezaus t’as comunidatz en rebeldía d’ista redolada a o sur de Mexico, en a muga con Guatemala.

A chornada prencipiará con un maitin pleno d’actuacions endrezadas t’os más chicotz. O Centro Civico Almozara acullirá as actuacions de Teatro Arbolé, Lü de Lürdes y Nostraxladamus, en una sesión presentada por La Imaquinaria. De tardis ye o turno d’os adultos, con más de tres horas de animación por a on que pasarán as mosicas de Juako Malavirgen, China chana y Bufacalibos de Biella nuei, os monologos de Wuatu, u o teatro de Escuela Comica Suicida y Nostraxladamus. Tot con a presentación d’o poeta Daniel Rabanaque, qui ferá de menador d’o programa.

En ista ocasión os diners replegaus se destinarán a refirmar o treballo que se fa en a Clinica d’a Muller d’o Caracol de La Garrucha que, seguntes Caracol Zaragoza “ye un gran eixemplo de como desembolican a suya Autonomía as Comunidatz indichenas de Chiapas. Una Autonomía a on que as zapatistas deciden por a suya salut, a suya chusticia, a suya amostranza, o suyo treballo u a suya tierra y a on que a muller ocupa o puesto que le pertoca aintro d’a comunidat”.

En anteriors edicions, o festival ye estau tot un exito y se han replegau diners t’os caracols (centros lochisticos d’as comunidatz en rebeldía) destinaus a toda mena de prochectos como hespitals, radios libres, escuelas, formación, …

A luita zapatista amostró fa bellas semanas que continaba bien viva dimpués de que bells 40.000 bases de refirme zapatista se’n baixasen d’a montanyas plenando as carreras de cinco ciudatz d’o sur mexicano en una marcha silenciosa plena de simbolismo.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.