Un festival folk pa salvar as montanyas d’Aragon

O 4 de setiembre se celebrará en a Canal Roya un festival de mosica folk con l'obchectivo de trucar o ficacio sobre a necesidat de conservar iste espacio.

Cartel d'o Canal Roya Folk

Cartel d’o Canal Roya Folk

O proximo día 4 de setiembre tendrá puesto en o marco incomparable d’a val d’a Canal Roya un concierto de mosica folk aragonesa que mira trucar o ficacio sobre a necesidat d’esfender a cultura, o paisache y a economía sostenible d’o Alto Aragón y en concreto d’a val d’a Canal Roya, que en istes zaguers anyos ha estau seriosament menazau por o prochecto d’unión d’a estacion d’esquí de Formigal (en a Val de Tena) con as de Candanchú y Astún (en a Val de l’Aragón).

Cada cierto tiempo y dende fa qualques anyos o nombre de Canal Roya saliba en os medios de comunicación y no precisament pa alabar a suya gran importancia ecolochica y o suyo magnifico estau de conservación, sino por motivos d’intréses especulativos que, seguntes os organizadors de l’evento “brenca han de veyer con o desembolique local y a economía d’os suyos habitants encara que asinas nos l’haigan quiesto vender”.

Tamién o refuse a istes plans que significarían a destrucción de tant valuroso tesoro natural, preservau entre cheneracions por os habitants d’ixes puestos, ha estau una constant por parte d’a sociedat civil que se plasmó fa ya muitos anyos en o manifiesto de l’Anayet que a día de hue sigue en plena vichencia y que os organizadors d’iste acto subscriben en a suya totalidat.

En o Canal Roya Folk participarán artistas de gran prestichio, como Os Bufacalibos de Biella Nuei, Kike Ubieto (d’Os Chotos d’Embún), Capitán Mundo u Tirurirus Free. A dentrada será de baldes dica completar aforo.

Asinas pues y con a intención que s’enruenen pa cutio os plans que pretenden alterar iste marabilloso enclave pirenaico, os organizadors d’o Canal Roya Folk, claman a la chent a participar en iste evento que se celebrará en o Campamento d’a Bordoseta de Canal Roya, situau a pocos menutos a piet d’o parking de Canal Roya, poco antes de Rioseta (Km 670 d’a carretera N­330a) y a 3 kilómetros d’Os Aranyons, cara ta Francia.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.