Un hombre asesina a la suya muller y ataca a os suyos dos fillos en Zaragoza

Os feitos escayeixioron en o zaragozano barrio rural de Santa Isabel. Una concentración a las 20 h. en a Pza. Espanya zaragozana ye convocada en repulsa

Concentración de repulsa en o Concello zaragozano. Foto: Concello de Zaragoza

Concentración de repulsa en o Concello zaragozano. Foto: Concello de Zaragoza

Ahiere domingo trahió un trachico suceso a la capital aragonesa. Un nuevo asesinato masclista escayeixió sobre as 12:15 horas en o barrio rural de Santa Isabel. Seguntes fuents d’a investigación, un hombre atacó a la suya muller, de 72 anyos, con un mallo metalico, causando-le grieus traumatismos en a cabeza y en atras partes d’o cuerpo, que le causoron a muerte dimpués d’estar intervenida d’urchencia en o Hespital Clinico Universitario zaragozano.

Posteriorment, l’hombre atacó a un d’os suyos fillos, de 39 anyos, que yera en o mesmo domicilio y permaneixe en estau grieu en o citau hespital zaragozano. L’atro fillo, de 45 anyos, i acudió dimpués que su pai le trucase. Allí le aventó un pozal de leixiva, resultando feriu lieu, seguntes as fuents d’a investigación. O presunto agresor ye ingresau en a unidat psiquiatrica d’o Hespital Royo Villanova de Zaragoza. No existiban denuncias ni antecedents d’agresions anteriors.

Un vecín alertó a la Policía Nacional espanyola, que s’ha feito cargo d’a investigación, d’una fuerte discusión en o citau domicilio familiar.

Mientres o día d’ahiere s’ha sucediu diferents muestras de condena a iste asesinato masclista dende os diferents partius politicos y cargos institucionals. S’ha realizau minutos de silencio y concentracions de repulsa a las 10 h. de hue lunes en a siede d’o Gubierno d’Aragón y a las 11:30 h. en o Concello de Zaragoza. Ista mesma institución ha declarau un día de luto oficial, hue lunes. A las 20 h. de hue, a Coordinadera d’Organizacions Feministas de Zaragoza (COFZ) ha convocau una concentración en a Pza. d’Espanya de Zaragoza.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.