Un hombre mata a 50 personas con un fusil d’asalto en un club gai d’Orlando (EEUU)

L'ataque homofobo ha estau reivindicau por o Estau Islamico (ISIS). 53 personas son encara feridas, belunas en estau critico

Un furgón d'os SWAT debant d'o club. Foto: Policía d'Orlando

Un furgón d’os SWAT debant d’o club. Foto: Policía d’Orlando

A Policía d’Orlando (Estaus Unius) ha confirmau que l’ataque contra un club gai d’a ciudat ha resultau con a lo menos 50 muertos a causa d’os disparos efectuaus por l’asaltant. Os zaguers balances sinyalan que i hai atras 53 personas que han habiu d’estar hespitalizadas y que beluns d’os ferius se troban en estau critico. En o momento de l’ataque, en l’interior d’o Club Pulse 320 personas celebraban una fiesta d’Argüello Latín.

A Policía sinyala a Omar Mir Sediq Mateen, ciudadano estadounidense de 29 anyos, como responsable de l’ataque rechistrau arredol d’as 02.00 (hora de Florida, EEUU). L’atacant ha remaniu quantas horas con rehens dimpués d’efectuar disparos arrienda, seguntes medios locals.

Mientres que Barack Obama dició entre una compareixencia debant d’os medios que encara no se teneba clara a motivación de l’asaltant, l’achencia Amaq, cercana a ISIS, informó que o grupo terrorista reivindica l’ataque.

Mateen yera fillo de pais afganos. Treballaba como guardia de seguranza privada y contaba con permiso ta portiar armas en o Estau de Florida. Seguntes a Policía d’Orlando, entró en o local con un fusil d’asalto AR-15 y una pistola.

O suyo pai, Mir Sediqque, ha afirmau a la cadena NBC que l’ataque “no tien pon a veyer con a relichión”. Sí ha descrito una conversación recient con ell. Entre una gambada por Miami fa uns meses, Omar Mateen s’encarranyó tot veyendo a dos hombres fer-se besos en a carrera. “Queremos pedir disculpas por o que ha ocurriu”, ha dito. “No tenebanos ni ideya d’o que iba a fer. Somos impactaus como tot o país”.

Omar Mateen yera esvurciau d’a suya primer muller. Ella ha declarau a The Washington Post que yera un hombre violento y mentalment inestable que prencipió a pegar-le poco tiempo dimpués d’o matrimonio. “No yera una persona estable”, diz a muller que no da a suya nombre porque teme por a suya seguranza. “Me pegaba. Plegaba en casa y prencipiaba a pegar-me porque a lavadora no heba rematau u qualsiquier coseta como ixa”.

A exesposa confirma que Mateen naixió de Nueva York y que a suya familia se tresladó anyos dimpués ta Florida. En a suya pachina de MySpace, ell amaneixe posando fendo-se selfies con una camiseta con as siglas NYPD (inicials d’a Policía de Nueva York). A muller ha confirmau que Mateen ye qui sale en ixas fotos.

S’acomodoron en marzo de 2009 y alavez pareixeba “una persona normal”. Mientres o suyo matrimonio, no yera una persona muit relichiosa y quan no yera en casa pasaba a mayor parte d’o tiempo en un chimnasio. Teneba licencia d’armas gracias a o suyo treballo de guardia de seguranza en un centro d’internamiento de menors.

O matrimonio solament duró uns pocos meses. Poco tiempo dimpués que ell prencipiase a pegar-le, a muller gritó a os suyos pais y decidió abandonar-le rapidament. Fuoron os suyos pais os que insistioron que le deixase. Mateen intentó dimpués meter-se en contacto con ella, pero a muller se negó. “Literalment, ells me salvoron a vida”, diz agora referindo-se a os suyos pais. O esvurcio se produció en 2011.

Un arma de guerra que se vende a civils

O fusil AR-15 ye a mesma arma que s’utilizó en atras matanzas en EEUU en os zaguers anyos, como a de Sandy Hook en 2012, con 26 personas asasinadas, y Santo Bernardino en 2015, con 14 muertos. Dimpués d’istes dos crimens multiples, y debant d’a posibilidat que o Gubierno d’EEUU restrinchise a suya venda, o qual nunca no se produció, as vendas de l’AR-15 se disparoron en quantas ciudatz d’Estaus Unius.

A as 12.00 (hora espanyola) a Policía d’Orlando confirmó que l’atacant heba estau zabucau. O tirador ye muerto“, aseguraba en un tuit a policía d’Orlando.

O portavoz policial sinyaló en rueda de prensa que s’han produciu “mas victimas d’o que pensabanos en o prencipio”. “Quan hemos estau seguros que no i heba mas explosivos, y hemos teniu a seguranza ta entrar, hemos puesto confirmar que mas de 50 personas heban estau asasinadas”, ha asegurau. O portavoz d’a Policía d’Orlando se refirió a la dimensión de l’ataque asegurando que “ye a pior trachedia que hemos visto dica agora“.

As autoridatz d’Orlando y as d’o Estau de Florida han declarau o estau d’emerchencia. A Casa Blanca ha emitiu un comunicau en que ha amostrau as suyas condolencias: “Os nuestros pensamientos y oracions son con as familias y os suyos sers querius”. Amás, o president ha pediu “recibir actualizacions regulars d’o FBI asinas como d’atras autoridatz federals que treballan con a Policía d’Orlando ta aconseguir-ne mas información”.

Entre l’ataque, os responsables d’o local preboron d’avisar a os suyos clients d’a gravedat d’o que yera succedendo. Dimpués d’os primers disparos, os responsables d’o club nocturno Pulse, situau en o centro d’Orlando, penchoron en a suya pachina de Facebook un mensache en que pediban que totz salisen d’o local.

Ricardo Negron Almodovar, un testigo d’os feitos, contó a BBC que l’hombre prencipió a disparar arredol d’as 2.00 (hora local), quan o club iba a zarrar. “Sentiemos un tiroteyo. En a sala en a que yera, a chent se tiró por tierra. No podié veyer a l’hombre que disparaba ni a personas feridas”, apuntó. En o suyo caso podió salir d’o local correndo por una salida que conduciba ta un patio.

As autoridatz a o frent d’a investigación han anunciau que actualizarán os datos de victimas.

Fuent: http://www.eldiario.es/internacional/hombre-atrinchera-rehenes-Orlando-tiroteo_0_525997429.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.