Un hortal ecolochico en a Plaza d’o Pilar de Zaragoza

O pasau sabado a Plataforma por L’Hortal Zaragozano se dio a conoixer en a Plaza d’o Pilar plantando un hortal ecolochico.

Os ninos participón en a creyación de l'hortal. (Foto: Luis María Giménez Sanz)

Os ninos participón en a creyación de l’hortal.  (Foto: Luis María Giménez Sanz)

 

O pasau sábado 16 de febrero a Plataforma por L’Hortal Zaragozano fació a suya presentacion publica con una chornada d’actividatz en a Plaza d’o Pilar de Zaragoza ta dar a conoixer o “Decalogo por a recuperacion de l’hortal zaragozano”. Iste decalogo replega os argumentos ta recuperar os hortals d’os arredols de Zaragoza que en os zaguers anyos son perdendo-se por o creiximiento y a especulacion urbanistica, asinas como por un cambeo en os costumbres d’alimentacion y consumo d’os ciudadans.

Ta sensibilizar-ne se i fación una ripa d’actividatz que escomencipioron por a creyacion d’un hortal en a mesma puerta d’o concello; puestos informativos; actividatz con os niños; replegada de sinyaturas; asinas como un treatet an que s’explicaba a evolucion de l’hortal dende o tiempo d’os romans dica hue, tot rematau con a lectura d’o decalogo por parti d’a chent d’os diferents achents socials involucraus.

Bellas 200 personas i veyoron a representación treyatal, y cuasi bells 600 i pasoron mientres o maitin. Cal destacar a participación d’os mas chicorróns que podioron plantar os suyos propios vechetals en l’hortal.

Os principios alazetals que esfende a plataforma son: a recuperación de l’hortal de Zaragoza t’alimentar a os suyos ciudadans; un hortal que siga ecolochico y de cercanía; an que se recuperen as variedatz tradicionals d’Aragón; que se cudie o patrimonio rural y cultural agricola.

Por ixo dende a plataforma reclaman a puesta en marcha de politicas que refirmen a labor d’os agricultors, fendo o suyo treballo rentable, a creyación d’una marca de calidat d’os productos feitos en Zaragoza, y a educación y l’empente d’o suyo consumo entre a población. Ye por ixo que a principal reclamación ye que o concello de Zaragoza leve a cabo a echecucion de un prochecto piloto de hortal de KM0 baixo istas condicions como ya aprebó o pasau 13 de noviembre.

A Plataforma por L’Hortal Zaragozano replega a colectius socials, ecolochistas, collas de consumo, sindicatos agrarios y bells partius políticos. Antimas o decalogo ye refirmau por muitas más asociacións y chent particular.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.