Un imputau por l’escrache a la casa de Lanzuela en Cella

A causa se ha reubierto dimpués d'o recurso d'o diputau d'o PP

Escrache en Cella (Foto: El ventano)

Escrache en Cella (Foto: El ventano)

O chuez d’o Chuzgau d’Instrucción numer 2 de Teruel ha imputau a Juan Brovia, un d’os portavoces d’a Plataforma Stop Desahucios (Atura os esfuizamientos), por a manifestación feita en Cella o 14 d’abril, amán d’a casa que tien o diputau d’o PP Santiago Lanzuela.

En a manifestación, os participants no podioron amanar-se t’a casa ni estioron autorizaus por l’amplo dispositivo d’a Guardia Civil a deixar-ie una carta en o buzón explicando a Lanzuela as reivindicacions d’a PAH. T’a part d’alavez, ista plataforma yera estando motivo de polemica por os escraches y as furas acusacions de coaccions y mesmo nazismo de man d’o gubiernos espanyol y aragonés.

Brovia habrá d’ir t’o chuzgau a declarar-ie en calidat d’imputau o venient diya 8 d’octobre. Antimás d’a suya declaración, o chuez parará cuenta d’as informacions apareixidas en os medios de comunicación por si bi hese inchurias contra o diputau d’o PP.

En primeras, a causa heba estau archivada en mayo, en entender-se que no bi heba habiu “violencia” ni “faltadas” contra o diputau ni contra os achents policials. Mesmo en l’auto se i explicaba que a manifestación heba estau “de traza pacifica dica la suya fin”. Iste archivo estió recurriu por o mesmo Lanzuela y o Ministerio Fiscal debant de l’Audiencia Provincial, estando estimau y resultando imputau Brovia.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.