Un mayestro deteniu en una protesta d’a Marea Verda

Os manifestants se concentroron en o Centro Civico Almozara a on que a consellera yera fendo un acto

Un inte d'a detención (Foto: Marea Verda)

Un inte d’a detención (Foto: Marea Verda)

Iste miercols un mayestro, miembro d’a Marea Verda, estió deteniu “por desobediencia y resistencia a la autoridat” en una protesta contra as retalladas en l’amostranza feita en o Centro Civico Almozara, a on que a consellera d’Educación, Dolores Serrat se trobaba en un acto d’o PP. O deteniu yera levau t’a comisaría d’o Paseu María Agustín, a on que companyers suyos demandaban a suya liberación. A las 23:00 yera finalment liberau.

O pleito prencipiaba de tardis quan bells miembros d’a Marea Verda dentroron en o Centro Civico Almozara. Bi yera fendo un acto a consellera d’Educación Dolores Serrat. Seguntes fuents policials l’acto yera interno d’o PP, encara que bi heba representants d’atros partius y no deixoron dentrar-ie a garra miembro d’a Marea.  Dimpués d’estar-se-ie bell rato chilando contra las retalladas, os miembros d’a Marea Verda negociaban salir d’o Centro Civico “a truca de no fer garra identificación”, como informa a propia Marea. Bells miembros remeraban que as identificacions a soben rematan en pinyoras, como en o caso d’os 52 identificaus d’a Plataforma contra os esfuizamientos.

Ya difuera de l’edificio, a policía demandaba la documentación a un profesor y un mayestro, afiliaus a CGT y STEA, respectivament. A resta d’a chent “feba uellos de caparra” y prencipiaba a chilar “cumple a tuya parola”  y “sí lo ha dito” en referencia a l’alcuerdo feito bells minutos antis, que la policía niega. Una d’as personas ha carranyau a la policía por querer identificar-le y ha prencipiau una pleitina que ha rematau con o mayestro por tierra antis de detener-le y levar-le ta comisaría acusau de “desobediencia y resistencia a la autoridat”.

A Marea Verda, qui han feito un comunicau sobre istos feitos, crei que a orden de no deixar-les marchar sin identificar-se vien “dende alto”. Iste movimiento ciudadano exiche que se “respesten os nuestros dreitos de libertat d’expresión, de manifestación y de protesta pacifica” y anucian que continarán “manifestando o nuestro refés t’as politicas de retalladas de l’administración”, y denunciando “os abusos  que se fan debant d’os nuestros dreitos y libertatz”. “Somos docents, no pas delinqüents“, rematan.

A polemica sobre as actuacions policials arredol d’a consellera d’Educación Dolores Serrat continan creixendo. Cinco personas estioron imputadas por a conoixida como “acción tupper”, en a que, en chinero d’ista anyada, bells miembros d’a comunidat educativa metioron bells tuppers en una farola d’a carrera Alfonso de Zaragoza, a on que tien domicilio a consellera. O 17 d’abril una manifestación de CGT se viedaba en pasar por a debantdita carrera. Ya d’antis, en chunio de 2012, a policía prencipió a presión contra  iste colectivo, con as identificacions a los participants en una protesta en esfensa d’a Educación Publica en o Puent de Fierro.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.