Un menor mapuche ye feriu en a enesima incursión de l’exercito en a comuna d’Ercilla

O menor recibió diez impactos de balins en una acción a on que o militars disparoron contra a escuela y bellas casas particlars.

Estudiants mapuches en una protesta (Foto: Mapuexpress)

Estudiants mapuches en una protesta (Foto: Mapuexpress)

Bells 200 efectivos d’a policía militar chitena atacoron o chueves 19 d’abril a comuna d’Ercilla d’a comunidat mapuche, y fotioron tiros con un resultau d’un choven feriu que se levó ta l’hespital con dos impactos de perdigons repartius por tot lo cuerpo. Fuents presencials denuncian que a policia dentró en a comunidat de Temucuicui, en a comuna d’Ercilla, en horas de clase y prencipió a disparar balins por tot, contra a escuela y as casas d’os mapuches.

Miembros d’a comunidat han culpau a lo fiscal d’a zona, Luis Chamorro, qui seguntes os mapuches ‘ye un periglo t’a paz social y a sana convivencia entre os mapuches y os chilenos’. Tamién denuncian que dende que Chamorro ye plegau en a zona, son reiteraus os abusos, montaches policials y persecucions contra o pueblo mapuche, y aseguran que debant d’istos atentaus, a comuna d’Ercilla tornará a movilizar-se.

Ercilla, sita en o centro de Chile, ha teniu un total de 14 incursions de l’exercito en os zaguers meses. A l’arreu d’a incursión d’o 8 de chinero -quan una gran dotación de militars atacó la comuna con gases glarimochens, con o resultau de bellas personas feridas- a comunidat demandó protección a l’Estau Chileno.

Diferents chueces, manimenos, han dito que a incursión d’os carabiners ‘no estió arbitraria’ y respondió a midas de seguridat, dimpués d’un ataque de bells encapuchaus contra os militars. Debant d’ixo, a comunidat Wanako Millao d’a comuna d’Ercilla fació publico un comunicau a on que denunciaba que as incursions se deben a la negativa d’os mapuches t’abandonar parti d’as suyas tierras a favor d’os colonos. O texto tamién criticaba que os mapuches hesen estau represaliaus y encorrius, con prebatinas de chantache de man de funcionarios publicos ta que abandonasen as suyas tierras ancestrals.

D’atra man, y en relación con os conflictos que mantienen con as interpresas multinacionals que operan en o suyo territorio, os mapuches de Neuquén (Archentina) han celebrau a nacionalización d’YPF de man d’o gubierno archentino, encara que remeran que agora l’estau habrá de fer-se cargo d’as deudas culturals, economicas, socials y ambiental que deixa Repsol. En iste sentiu, cal remerar a demanda conchunta d’as comunidatz mapuches d’o Lomo de la Lata, a on que acusaban a la multinacional de contaminar os suyo rios y tierras y de graus perchuicios ambientals y socials. Antimás de Repsol, una atra interpresa con capital espanyol, Endesa, ye agora en o punto de mira d’as criticas mapuches, ya que ha prencipiau un nuevo prochecto de central hidroelectrica en a redolada de Panguipulli, declarada reserva mundial d’a biosfera.

Fuent: http://www.nationalia.cat/ca/noticies/1111

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.