Un nuevo sistema recupera o helio emplegau ta enfredar equipos scientificos y medicos

O sistema puet fer cabidar muitos diners en as tecnicas que fan servir l'helio, un recurso caro y prou dificil de conseguir

Bells representants d'as entidatz (Foto: Unizar)

Bells representants d’as entidatz (Foto: Unizar)

Investigadors d’a Universidat de Zaragoza, d’o Consello Superior de Investigacions Scientificas (CSIC) y d’a interpresa GWR Instruments han desembolicau y patentau un nuevo sistema t’a licuefacción y recuperación d’helio a chicota y meya escala. O metodo ye capable de recuperar o 100% de l’helio liquido emplegau en a refricheración d’equipos scientificos y medicos.

O sistema, sencillo y de buen emplego, estió presentau o miercols en o Paraninfo d’a Universidat de Zaragoza, con a presencia d’os responsables y de bellas autoridatz.

“Ista nueva tecnica permitirá achiquir o consumo d’un recurso estratechico, amugau y d’altero coste, que se fa servir tanto en forma liquida como gaseosa en investigación, en equipos medicos y en a industria, lo que suposará que se cabiden firmes diners en estar un elemento escaso y caro. Ya ye sustituyindo a las actuals plantas de recuperación industrial, muito complexas y que chitan t’atmosfera una parti important de l’helio emplegau”, ha explicau Conrado Rillo, coordinador d’o desembolique.

A invención ye  basada en tecnicas nuevas de recuperación y purificación d’o gas procedent d’a evaporación d’o liquido en os equipos scientificos u medicos. O proceso de licuefacción s’adapta a lo consumo, ya que o liquido produciu se mantien sin perdas o tiempo que cal dica que se torne a fer servir. “Lo que hemos ideyau se basa en emplegar as propiedatz termodinamicas d’o gas y en un nuevo sistema de control de presión y fluxo en o recipient a on que s’almagacena o liquido produciu ta quitar-ne a maxima potencia t’o refricherador y conseguir asinas tasas de licuefacción optimas”, precisa l’investigador Rillo.

O helio ye un gas fosil, que se consigue deseparando-lo d’o gas natural en bells pocos chacimientos d’o mundo. Ye un recurso estratechico, amugau y caso, que en estau liquido puet plegar a costar 40 euros por litro, entre que en estau gaseoso puet costar entre 10 y 30 euros o metro cubico. “Con o nuestro metodos, o cabidar en litros plega en o 100% a las pocas semanas d’instalación d’a planta. O coste de l’helio liquido ye, alavez, o coste d’a electricidat sumau a lo mantenimiento y l’amortización d’a planta, estimau entre uno y dos euros por litro produciu”, aclara Rillo.

Iste sistemas ye estau meso como un d’os eixemplos de investigación aplicada a la industria que puet sacar-ne firme treslada a Universidat. Se calcula que o retorno economico procedent d’a explotación d’a licencia t’o CSIC y a Universidat de Zaragoza puet plegar a superar o millón d’euros a l’anyada.

 
 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.