Un policía local furta la bicicleta d’un ciudadán

Ocurrió lo chueves en o zaragozano vico d'as Delicias.

A bici que o policía le furtó a Rubén alegando que yera suya. (Foto: Rubén García).

Ocurrió lo chueves, un chóven, Rubén García, deixó arredol d’as 11.00 d’o maitín a suya bicicleta atada con cadena en un parking ta bicicletas que bi ha en o zaragozano paseyo de Calanda, cantón con a carrera Graus. En tornar-ie a las 12.00 a bici ya no i yera, man y menos, l’heban deixau una nota escrita a man en un troz de papel “pongase en contacto con la policía nacional comisaria delicias para recuperar la bicicleta “.

Rubén fuó a la comisaría ta denunciar o furto, y qual estió a suya sorpresa quan le dición que no le’n heban furtau, sino que un policía local la pilló porque asegura que ye a suya bicicleta, que le’n furtón fa dos meses. “Agorá tendré cita chudicial y habré de levar prebas ta contrimostrar que a bici ye de yo”, ha explanicau Rubén a Arredol.

O policía local, dimpués de crebar a cadena y levar-se a bici o chueves, fació ixa mesma tardi una denuncia de furto, que encara no heba feito, y un acta d’entrega. “Tot chusto dimpués de furtar-me a bici”, aseguró l’afectau a Arredol, “la deixó en o cuartel Palafox d’a policía local, an que me levón a reconoixer a bici ta levar-la a la comisaría de Delicias, an que ye agora a l’aspera de que nos grite o chuez por separau t’aportar prebas sobre a propiedat d’a bici”.

Rubén asegura que tien a bici dende fa dotze anyos y que le’n mercón sus pais. A bici la trayó dende Monzón, d’an que ye natural, ta Zaragoza, an que estudea, o 10 de chinero, y que fa dos meses, quan le’n furtón a o policía, yera en Monzón.

Agora Rubén García ha de reviscolar d’entre as suyas fotos viellas ta trobar prebas y que le tornen a bici y le indemnicen.

Una rispuesta a Un policía local furta la bicicleta d’un ciudadán

  1. Pos se bei que iste polizía gosa portiar unas estixeras de tronzar cadenas en a pocha. Igual tamién leba un traste d’espantar cocodrilos y un trache de buzo. Nunca no s’en sape qué puede pasar.

    Por atra parti, una bizi con doze añadas ya se merexerá que l’aigan feito bella foto. Si no, o zagal tendrá que fer baxar á os suyos pais ta Zaragoza ta que acrediten que ixa bizi estió un presén d’els.

    Yo ya he feito fotos de as bizis mías (por si alcaso).

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.