Un trencauesos naixiu d’Aragón muere tiroteyau en o sud de Francia

L'au heba estau anillada en a comarca d'a Chacetania. A muerte ye muit probable que no ha estau un accident

Foto: SEO/BirdLife

Foto: SEO/BirdLife

Benigno, un trencauesos de 13 anyos naixiu d’Aragón en l’anyo 2000 y que se reproduciba dende fa anyos en Nabarra, ha muerto a causa d’os impactos de seis perdigons de caza. A Ligue pour le Protection des Oiseaux (LPO) ha dau treslau que Benigno estió trobau en una cuneta d’o ferrocarril que une Bayona y Sant Chuan Piet de Puerto, amán d’o lugar d’Ossés, en os Pirineus franceses, o día 24 de noviembre y murió, a causa d’as suyas feridas, o día 26. LPO y SEO/BirdLife forman parte de BirdLife International, una coalición d’ONGs de conservación especializadas en aus que cubren 121 países y tien millons de socios y simpatizants.

Seguntes ha informau a LPO, estió o centro Hegalaldia, de recuperación de fauna silvestre, o primer en estar avisau y o que aconsiguió recuperar a l’au d’a hipotermia que sufriba. Manimenos, pese a os cudiaus dispensaus, Benigno murió dos días dimpués.

A dispersión d’os plomos indica, seguntes a nota de prensa de LPO, que o disparo se produció a uns 40 metros de distancia, por o que a posibilidat que se tracte d’un accident ye despreciable.

Seguntes LPO, o departamento d’os Pirineus Atlanticos, en o sud de Francia, tien o record d’istas aus muertas por disparo. Ta SEO/BirdLife, a muerte d’iste eixemplar amuestra o periglo a que s’enfrontinan especies menazadas  como o trencauesos (Gypaetus barbatus), una d’as grans aus carnuceras d’a nuestra fauna, con una población muit tasa y una situación de conservación muit delicada.

Se da a circumstancia que l’eixemplar tiroteyau heba estau capturau y marcau en a comarca d’a Chacetania (Uesca) dentro d’o Plan de Recuperación d’o Trencauesos desarrollau por o Gubierno d’Aragón en coordinación con a Fundación t’a Conservación d’o Trencauesos (FCQ). Benigno recibió ixe nombre, curiosament, en homenache a o conoixiu naturalista espanyol Benigno Varillas, que estió present mientres o suyo anillamiento en os Pirineus.

Iste delito puede estar castigau con 15.000 euros de pinyora y un anyo de prisión en Francia. SEO/BirdLife,  LPO, FCQ, Hegalaldia y Saiak lamentan iste acto escandaloso contra fauna menazada. Si ista muerte s’hese produciu en Espanya, o codigo penal estableixe que o castigo podría plegar en dica dos anyos de prisión y inhabilitación de cazar u d’exercer a profesión dica quatro anyos.

Fuent: http://www.cronicadearagon.es/wordpress/?p=46060

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.