Un vecín d’a Cinca Meya, imputau por a muerte “anguniosa” d’una dotzena d’aus

A Guardia Civil ha informau de l'hallazgo d'una serie de calavres pertenecients, en bells casos, a aus menazadas. Pareixe que todas estioron afectadas por un insecticida viedau dende 2007

esparver

Esparver. Foto: Biquipedia

Un vecín d’a Comarca d’a Cinca Baixa ha estau imputau por a Guardia Civil por una serie de presuntos delitos continaus contra a fauna, en concreto contra seis aligas reyals, un bubón reyal, dos aliguchos, dos milans reyals y un esparver común; totz ells han estau trobaus muertos por as autoridatz en os arredols d’un coto de caza privau en o qual treballa o presunto autor d’os feitos.

Seguntes han informau fuents d’a investigación, iste vecín habría enverenau a las aus a traviés de cibos toxicos colocaus en dito coto privau. A operación ha levau a la Guardia Civil unas quantas semanas de treballo, ya que a primera au muerta -un aliga reyal- se trobó o pasau mes de chinero. Os achents que dioron con o cuerpo lo tresladoron dica o centro de recuperación de fauna silvestre de l’Alfranca, en Zaragoza, y allí se podió certificar que l’animal heba muerto a causa d’a inchesta d’un cibo impregnau en un potent vereno que se feba servir normalment como insecticida ta arbols dica que se viedó o suyo emplego en 2007.

Ta esclarir as causas d’a muerte de l’animal, a Guardia Civil realizó una serie de batidas por a zona de l’hallazgo. Fruito de ditas pesquisas se troboron mas calavres d’aus, qualques d’ellas incluyidas en a relación d’animals menazaus. Seguntes os estudeos posteriors, todas heban muerto enverenadas con a mesma substancia. Con l’abance d’as investigacions, s’ha puesto imputar a iste vecín, a qui se le han incautau cepos y gavias trampa, amás de mas eixemplars muertos.

A propia Guardia Civil ha confirmau que o vereno presuntament emplegau por iste individuo causaba a muerte a os animals d’una traza “anguniosa”, ya que actuaba en o sistema nervioso central y empachaba practicament dende o momento posterior a la inchesta qualsiquier capacidat de movimiento.

Fuent: http://www.aragon2.net/n-20615-2-vecino_Cinca_Medio_imputado_muerte_agonica_docena_aves

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.