Un verano desertico deixa os ríos en minimos ambientals, arruina os secanos y menaza o regano

A falta de plevidas seca os pastos en o Pirineu, arruina os cultivos de secano y obliga a estallar o ganau, con unos costes inasumibles

Entibo de Mediano en tiempo de sequera. Foto: Fernando Tomás (CC-BY 2.0)

Entibo de Mediano en tiempo de sequera. Foto: Fernando Tomás (CC-BY 2.0)

A prolargada sequera que dende finals d’a pasada primavera afecta a amplas zonas d’Aragón, en a mayor parte d’o territorio en que as plevias han estau entre tasas y inexistents dende prencipios de chunio, ye provocando grieus conseqüencias tanto en a vertient ambiental como en a productiva, con un estiache que ha situau a beluns d’os prencipals ríos aragoneses en os minimos pa guarenciar a supervivencia d’os suyos ecosistemas y con una ausencia de precipitacions que ha provocau perdas millonarias en a practica totalidat d’as zonas agricolas de secano.

O río Veral, afluent de l’Aragón, no ha superau a metat d’o cabal ambiental (70 litros por segundo de 150) a o suyo paso por Zuriza en os primers días de setiembre; o Esera ha prencipiau o mes a o limite en Grist, en a suya zona de cabecera, an que requiere bell poquet mas de 600, y a Cinca leva días con un descenso que le ye acercando a os 2.500 que amenista a l’altura d’o Puent d’as Pilas.

En atros como o Galligo, a marguin ye, encara que superior, no guaire amplo, ya que en os zaguers días plegaba en Zaragoza, an que o mantenimiento d’o suyo ecosistema fluvial requiere 1.260 litros por segundo, con bell poquet mas de 2.000, entre que a marguin en Bubal, en a suya cabecera, yera de 500 (850 por 350).

Afluents y entibos de l’eixe de l’Ebro baixo minimos

L’Ebro a o suyo paso por a capital mantiene un marguin elevau, como que, encara que ha caito en quantas ocasions en as zagueras semanas por baixo d’os 40.000 litros por segundo, as suyas necesidatz ecolochicas en istas calendatas son de 13.560.

Ixe cabal, manimenos, s’acerca progresivament ent’os 30.000 en que ye fixau o suyo cabal de seguranza, o minimo necesario pa que no tiengan efectos toxicos os mils de vertius autorizaus auguas alto.

En no estar que se produzcan auguas alto plevidas intensas, o mas probable ye que o cabal circulant por l’eixe de l’Ebro siga cayendo en os proximos días, pues qualques afluents como l’Ega u o Nacheriella se troban baixo minimos –totz dos han caito por baixo d’o minimo ambiental en as zagueras semanas- y as reservas d’os grans entibos situaus auguas alto, como o de cabecera, Yesa en Aragón u Itoiz en Irati, son descendendo. Os rechistros ya son inferiors a o 30% en totz dos zaguers casos.

Secanos arruinaus y riegos en situación critica

Ixe descenso d’as reservas en os entibos mete en risgo o tramo final d’a campanya en beluns d’os prencipals sistemas de regano, caso de Bardenas y a zona uescana d’a Canal d’Aragón y Catalunya.

En condicions normals, en totz dos sistemas quedaría a lo menos un mes de riegos en que mils d’agricultors se chugan a viabilidat d’as collitas de panizo no temprano.

Ixo, por lo que fa a o regano. En o secano queda poco por fer. Un informe d’a organización agraria Uaga alertaba fa uns días d’as grieus perdas que a sequera ye provocando en cultivos como l’almendrera, o chirasol y a vinya, de vez que a falta de pastos obliga a las explotacions de ganadería extensiva a alimentar a las suyas reses –ovino y vacuno, mayoritariament- con piensos, o que dispara os costes y, en muitos casos, les aboca a zarrar l’anyada con perdas.

Os pastos se secan en tot o Pirineu

Seguntes Uaga, “en todas as comarcas d’o Pirineu -Chacetania, Alto Galligo, Sobrarbe y Ribagorza- s’han secau os pastos pa lo bestiar, por a falta de plevida y as altas temperaturas”.

Ixo ha empachau, por primer vegada en anyos, que numerosos rabanyos de vacas haigan estau tresladaus a zonas d’alta montanya pa pacer entre os meses de calor. Se troban estallaus, como a mayor parte d’a cabana ovina.

As estimacions d’a organización agraria sitúan en 1,10 euros y en 61 centimos o coste diario de l’alimentación de cada cabeza de bestiar vacuno y ovino, respectivament, mientres remaneixen estallaus.

Fuent: http://www.eldiario.es/aragon/sociedad/desertico-ambientales-arruina-secanos-regadio_0_557844265.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.