Un viache a os Ibóns d’o Sobrarbe

D’o 28 de noviembre a o 2 d’aviento de 2011 va a desenvolicar-se a Semana “Un viache a os Ibóns d’o Sobrarbe”, una campanya de sensibilización y difusión d’os resultaus obtenius a lo largo d’os dos anyos precendents derivaus d’escoscar y de l’actuación reyalizada sobre quatre ibóns (A Munia, Bernatuara, O Cao y o de Sein).

 

Istas actividatz fan parte d’as incluyidas en l’exe 2: “A nueva cultura de l’augua” d’o proyecto de cooperación transfronteriza PIR-EDES (programa europeo POCTEFA). Ista campanya ye dirichida a toda la población de Sobrarbe y a os escolanos de 6º de primaria y 1º d’ESO con l’obchectivo de fer conoixer a grand importancia ecoloxica y paisachistica d’un d’os habitatz más febles de l’Alto Pirineo y consistirá en una charrada ta informar y sensibilizar a os escolanos y ciudadants sobre a importancia d’os ibons d’o Pirineo, a suya fauna, flora, problemas de conservación y alta valor ecoloxica por meyo d’audiovisuals y explicacións.

 

O miercols 30 de noviembre a las 19.30 horas, tendrá puesto a charrada endrezada a totz os publicos en a sala Geovisión d’a Torre Nordeste d’o Castiello de L’Aínsa y a resta de días d’a semana os protagonistas serán os escolanos, qui disfrutaran en os suyos centros escolars d’as explicacións y s’amanarán a o mundo d’os ibóns. O lunes será en Boltanya y Tierrantona; o martes en Laspunya, Bielsa y San Chuan de Plan; o chueves en Torla, Broto y Fiscal; y o viernes les ne tocara a os escolanos de l’Instituto de Secundaria Sobrarbe y o Colechio Asunción Pañart de L’Aínsa, qui trancaran iste viache a os ibóns d’a Redolada d’o Sobrarbe.

 

Mientras o desenvolique de l’actividat “Un viache a os ibóns” se tractarán os siguients puntos: Orichen d’o Pireneu;  formación d’os ibóns; os ibóns d’o Sobrarbe; por qué son importants os ibóns?; animals y plantas d’os ibóns; emplegos que se fan d’os ibóns y factors de regresión; conservación y perspectivas d’esdevenidero; as leyendas d’os ibóns; y estudeos y investigación d’os ibóns.

Ibón d'a Munia (Foto: viewport)

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.